काठमाडौं । आगामी भदौ ७ देखि १० गतेसम्मका लागि १४औँ महाधिवेशनको मिति तोकेको कांग्रेसले क्रियाशील सदस्यताको विवरण केन्द्रीय समितिलाई बुझाउने म्याद पुनः थप गरेको छ । देशभरबाट क्रियाशील सदस्यताको नामावली सफ्टवेयरमा इन्ट्री भइरहेका दुई सय सात स्थानमध्ये क्रियाशीलको विवरण इन्ट्री गर्न बाँकी रहेका एक सय ६ स्थानका लागि पुनः म्याद थपिएको क्रियाशील सदस्यता छानबिन समितिका सचिव केशव रिजालले जानकारी दिए ।

उनका अनुसार अव जेष्ठ २५ गते राती १२ बजेसम्म क्रियाशीलको विवरण अपडेट गरिसक्न र कुनै त्रुटि भएको भए सच्याउन क्रियाशिल सदस्यता छानविन समितिले निर्देशन गरेको छ ।

पटक–पटक सूचित गर्दा पनि क्रियाशीलको विवरण प्राप्त नभएको भन्दै कांग्रेसले १५ वैशाखको रातिदेखि क्रियाशील सदस्यताको विवरण इन्ट्री गर्ने सफ्टवेयर बन्द गरेको थियो । अहिलेसम्म करिब आठ लाख सदस्यको विवरण सफ्टवेयरमा इन्ट्री भएको छ । नामावली सार्वजनिक भइसकेका ठाउँबाट कसैको नाममा दाबी–विरोध वा उजुरी भए सम्पर्क गर्नसमेत समितिले आग्रह गरेको छ ।

केन्द्रीय समितिले यसअघि निर्धारण गरेको कार्यतालिकाअनुसार ५ असारदेखि वडास्तरबाट अधिवेशन सुरु हुनुपर्ने हो । तर, क्रियाशिल सदस्यताको अझै टुंगो नलाग्दा निर्धारित समयमा महाधिवेशन नहुने पक्का जस्तै भईसकेको कांग्रेसकै नेताहरु बताउँछन् ।