काठमाडौँ । जनता समाजवादी पार्टी (जसपा)को अध्यक्ष महन्थ ठाकुर समूहमा आकांक्षी धेरै र पाउने मन्त्रालय थोरै भएपछि मन्त्री बन्नेहरूको नाम टुंग्याउन समस्या भएको छ ।

सोमबार प्रधानमन्त्री निवास बालुवाटारमा प्रधानमन्त्री केपी शर्मा ओलीसहित एमाले नेताहरू र ठाकुर समूह करिब ४ घण्टा बैठक चलेको हो । बैठकले जसपालाई उपप्रधानमन्त्रीसहित ८ मन्त्री र २ राज्यमन्त्री दिएर सरकारमा लैजाने निधो भएको हो ।

बैठकमा प्रधानमन्त्री ओलीले मंगलबार नै जसपाबाट मन्त्री बनेकाहरूलाई शपथ गराउन नाम दिन आग्रह गरेका थिए । तर, पार्टीको समस्या मिलाउन पर्ने भन्दै जसपाका अध्यक्ष ठाकुरले बुधबारसम्मको समय मागेका थिए ।

मन्त्रीमा कसलाई पठाउने भन्ने बारेमा कसरत सुरु गरेका ठाकुरलाई आकांक्षी धेरै र मन्त्रालय थोरै भएपछि मिलाउन कठिन भएको छ । सोमबार दिउँसोदेखि आज बिहान १० बजेसम्म सरकारमा पार्टीको नेतृत्व गरेर जाने ४ मन्त्रीको मात्रै नाम टुंगिएको छ । सरकारमा जाने मन्त्रीहरूको नाम टुंग्याउन ५ दिन लाग्ने नेताहरूले बताए ।

ओलीसँगको वार्ता र मन्त्री बनाउने कसरतमा सहभागी जसपाका नेता लक्ष्मणलाल कर्णका अनुसार अहिलेसम्म जसपा बन्नुअघि राष्ट्रिय जनता पार्टीको अध्यक्ष मण्डलका चार जना सरकारमा मन्त्री बन्ने भएका छन् ।

‘तत्कालीन राजपाको अध्यक्ष मण्डलका चार मन्त्रीका रुपमा सहभागी हुने र पार्टीबाट सरकारमा नेतृत्व राजेन्द्र महतोले गर्ने मात्रै टुंगिएको छ,’ कर्णले भने । उनका अनुसार महतोसहित शरतसिंह भण्डारी, अनिल झा र राजकिशोर यादव मन्त्री बन्ने टुंगिएको हो । महतोले उपप्रधानमन्त्रीसहित आफ्नो पार्टीबाट सरकारको नेतृत्व गर्ने छन् । स्रोतका अनुसार महतोले ओलीसँग आफूलाई स्वास्थ्य तथा जनसंख्या मन्त्रालयको जिम्मेवारी दिन व्यक्तिगत रुपमा आग्रह गरेका छन् ।

यता कार्यकारिणी समितिमा बहुमत रहेको अध्यक्ष यादव समूहले सरकारमा गए कारबाही गर्ने भएकाले ठाकुर समूह कठिन अवस्थामा रहेका छन् ।

त्यस्तै, ठाकुर समूहमा अर्का अध्यक्ष उपेन्द्र यादव समूह छाडेर आएका ५ मध्ये तीन जनालाई मन्त्री बनाउनु पर्ने माग छ । तर, आफ्नो समूहका पनि धेरै आकांक्षी भएकाले कसरी व्यवस्थापन गर्ने भन्नेमा समस्या देखिएको छ । स्रोतका अनुसार ठाकुर र नेता महतोबीच उपेन्द्रलाई छाडेर आएका ५ जना सांसदमध्ये उमाशंकर अरगरिया, विमल श्रीवास्तव र एकवाल मियालाई मन्त्री बनाउने विषयमा छलफल भइरहेको छ । तर, नटुंगिएको नेताहरू बताउँछन् ।

बाँकी रहेका एउटा मन्त्रालयमा ठाकुरले चन्दा चौधरीलाई मन्त्री बनाउन चाहिरहेका छन् भने महतोले अमृता अग्रहरी वा लक्ष्मणलाल कर्णलाई मन्त्री बनाउन चाहिरहेका छन् । उपेन्द्र समूहबाट आएका ५ मध्ये दुईलाई मन्त्री र एकलाई राज्यमन्त्री दिएर भए पनि ठाकुरका एक र महतोका एक विश्वास पात्रलाई राख्ने विषयमा छलफल भइरहेको एक नेताले बताए । तर, त्यसो गर्दा अन्य नेताहरू चिढिएर उपेन्द्रको क्याम्पमा पुग्ने हुन कि भन्ने डरमा पनि नेताहरू छन् ।

दुई राज्यमन्त्रीमा रेणुका गुरुङ, चन्द्रकान्त चौधरीलगायतको नाममा छलफल भए पनि मन्त्रीको आकांक्षा देखाएकालाई राज्यमन्त्री दिने विषयमा छलफल चलिरहेको अध्यक्ष मण्डलका एक सदस्यले बताए । समानुपातिक, समावेशी सबै मिलाएर पनि नाम चयन गर्न समस्या भएको उनले बताए ।

जसपाका ३२ सांसदमध्ये २० जना सांसदले ठाकुरलाई साथ दिएका छन् । त्यसमा १० जना मात्र मन्त्री बन्ने भएकाले बाँकी १० जना असन्तुष्ट हुने र क्याम्प परिवर्तन गर्ने हुन कि भन्ने चिन्ता ठाकुर र महतोलाई छ । त्यसैले आफ्ना विश्वास पात्रलाई नदिएर भए पनि क्याम्प परिवर्तन गर्न सक्नेलाई मन्त्री वा राज्यमन्त्री दिएर मनाउन विषयमा छलफल केन्द्रीत रहेको ती नेताले बताए ।

तर, टुंगोमा पुग्न ५ दिन लाग्ने उनको भनाइ थियो । ४ नेताको विषयमा पनि सैद्धान्तिक सहमति भएको र बैठकबाट निर्णय लिन बाँकी छ ।

यता कार्यकारिणी समितिमा बहुमत रहेको अध्यक्ष यादव समूहले सरकारमा गए कारबाही गर्ने भएकाले ठाकुर समूह कठिन अवस्थामा रहेका छन् । त्यो कारबाहीबाट बच्न पार्टी फुटाउन ठाकुरले ओलीसँग सहयोग मागेका छन् । जसपामा ठाकुर समूहले सरकारलाई समर्थन गरेको छ भने यादव समूहले सरकारविरुद्ध सर्वोच्चमा हस्ताक्षर बुझाएको छ ।

गृहमन्त्री रामबहादुर थापा, ऊर्जामन्त्री टोपबहादुर रायमाझी, उद्योग वाणिज्य तथा आपूर्तिमन्त्री लेखराज भट्ट, सहरी विकासमन्त्री प्रभु साह, श्रम रोजगार तथा सामाजिक सुरक्षा मन्त्री गौरीशंकर चौधरी, युवा तथा खेलकुद मन्त्री दावा लामा र खानेपानीमन्त्री मणि थापाको मन्त्रीमा भएको नियुक्ति सर्वोच्च अदालतदे बदर गरिदिएपछि ती मन्त्रालय खाली छन् । त्यसमा गृह दिन नसक्ने ओलीले ठाकुर र महतोलाई बताइसकेका छन् ।