काठमाडौँ । सरकारले काठमाडौँ उपत्यकामा जारी निषेधाज्ञालाई केही प्रावधान खुकुलो बनाई थप एक साता निषेधाज्ञा गर्ने तयारी गरेको छ । काठमाडौँका प्रमुख जिल्ला अधिकारी कालिप्रसाद पराजुलीका अनुसार एक सातादेखि बन्द खाद्य तथा किराना पसलका लागि केही प्रावधान खुकुलो बनाएर निषेधाज्ञा थप गर्ने तयारी भएको हो ।

थप हुने निषेधाज्ञामा खाद्य किराना पसल र ग्रोसरी तथा डिपार्टमेन्टल स्टोरहरूसहित निर्माण सामाग्री ढुवानी गर्ने सवारी साधन र भन्सार विन्दुबाट छुटेका सवारीलाई सशर्त चल्न दिइनेछ । सार्वजनिक निर्माण सामाग्री ढुवानी गर्ने सवारीलाई रातिदेखि बिहान ५ बजेसम्म र सीमा भन्सारबाट छुटेका सवारीलाई जुनसुकै अवस्थामा चल्न दिने पराजुलीले जानकारी दिए ।

यसबारे निर्णय गर्न काठमाडौं उपत्यकाका सबै जिल्ला प्रशासनको संयुक्त बैठक मंगलबार दिउँसो ४ बजे बस्ने भएको छ । गत १४ गतेदेखि लगाइएको एक साताको निषेधाज्ञा कडाई भएको थियो । उक्त समयावधि २० गते राति सकिँदैछ ।

कोरोनाको दोस्रो लहर देखिएपछि सरकारले वैशाख १६ गतेदेखि उपत्यकामा निषेधाज्ञा जारी गरेको हो । यसबाहेक बाहिरी जिल्लाहरूमा समेत जिल्ला प्रशासनका अवस्था हेरी निषेधाज्ञा लगाउन पाउने गरी सरकारले अधिकार दिएको थियो ।