काठमाडौँ । प्रधानन्यायाधीश चोलेन्द्र शमशेर राणा हप्तादिन भित्र वरिष्ठताका आधारमा संवैधानिक इजलास गठन गर्न सहमत भएका छन् । सर्वोच्च बारका अध्यक्ष पूर्णमान शाक्यलगायतको टोलीसँगको छलफलमा वरिष्ठताका आधारमा इजलास गठन गर्न उनी सहमत भएका हुन् ।

‘संवैधानिक इजलास गठन सम्बन्धमा सहमति भएको छ, संवैधानिक इजलासको नियममा नै आवश्यकताअनुसार परिमार्जन गरी वरिष्ठताको आधारमा इजलास गठन गर्ने र वरिष्ठताको आधारमा गठन गर्ने,’ शाक्यले भने, ‘यसो गर्दा उनीहरुबारे पनि स्वार्थ बाझियो वा स्वास्थ्यको कारणबाट बस्न नसक्ने भयो भने त्यसभन्दा तलको सिनियर जो छ उसलाई ल्याएर इजलास गठन गर्ने कुरामा सम्माननीय ज्यूले सहमति जनाउनु भएको छ ।’

हप्ता दिनभित्र संशोधनको प्रस्ताव ल्याई पूर्ण इजलासबाट निर्णय गराएर न्याय परिषदबाट पास गर्ने समझदारी बनेको उनको भनाइ छ । सोहीअनुसार सर्वोच्चको संवैधानिक इजलास अघि बढाइने छ ।

संवैधानिक इजलासमा न्यायाधीश बमकुमार श्रेष्ठ र तेजबहादुर केसीलाई राख्न नहुने वकिलहरूले अडान लिएपछि यसबारे इजलासमा चर्को विवाद भएको थियो ।