काठमाडौँ । जनता समाजवादी पार्टी (जसपा)का संघीय परिषद अध्यक्ष बाबुराम भट्टराई र अध्यक्ष उपेन्द्र यादव पक्षलाई अर्का अध्यक्ष महन्थ ठाकुर र वरिष्ठ नेता राजेन्द्र महतो पक्षले कारबाही गरेको छ ।

मंगलबार अध्यक्ष ठाकुर, नेता महतोसहित नेताहरू सर्वेन्द्र नाथ शुक्ल र लक्ष्मणलाल कर्णलाई भट्टराई र यादप पक्षले ‍पार्टीबाट निष्कासन गरेको थियो । आफूलाई पार्टीबाट निष्कासन गरेसँगै विपक्षी पक्षलाई पनि आफूहरूले कारबाही गरेको नेता कर्णले जानकारी दिए ।

‘उहाँहरूले हामीलाई कारबाही गर्नु भयो, हामीले पनि उहाँहरूको पक्षलाई कारबाही गर्यौं,’ नेता कर्णले भने, ‘भोलि सरकारमा जाने विषयमा जे जस्तो आइपर्छ त्यहीअनुसार अगाडि बढ्छौँ ।’

आफूहरूमाथि कारबाही गरेलगत्तै ठाकुर र महतो पक्षले पनि यादव पक्षलाई पार्टीबाट निष्कासन गरेको हो ।

सरकारमा जाने विषयलाई लिएर जसपा विभाजनको संघारमा पुगेको हो । जसपाको ठाकुर र महतो पक्ष सरकरमा जाने तयारी गरिरहेको छ भने भट्टराई र यादव पक्ष प्रधानमन्त्रीबाट केपी शर्मा ओलीलाई हटाउने पक्षमा छन्।

जसपाको कार्यकारिणी समितिमा भट्टराई र यादव पक्षको बहुमत छ ।