काठमाडौँ । लेखक तथा सामाजिक अभियान्ता खगेन्द्र संग्रौलाले प्रधानमन्त्री केपी शर्मा ओलीले समृद्धिको नाममा चुरे क्षेत्रलाई दोहन गर्न खोजेको आरोप लगाएका छन् । उनले ‘समृद्ध नेपाल, सुखी नेपाली’ भन्ने नारा लगाए पनि चुरे क्षेत्रको दोहनबाट सर्वसाधरणको जीवनलाई तातो तावाका माछा जस्तै बनाउन खोजेको बताएका हुन् ।

‘ओलीतन्त्रले नेपाललाई समृद्धि र नेपालीलाई सुखी बनाउन चुरे शृङ्खलाका ९२ ठाउँबाट ढुंगा, गिट्टी र बालुवा भारत पठाउने भएछ,’ उनले भने, ‘भष्मासुर प्रवृत्तिको यो दुष्कर्मले त मान्यवर, नेपाललाई मरूभूमि, नेपालीलाई तातो तावाका माछा सरह बनाउने भो!, जोडजोडले विरोध बोलौँ, यो विधंशक कृत्यलाई बदर गरौैँ ।’

सरकारका अर्थ मन्त्री विष्णु पौडेलले गत जेठ १५ गते अध्यादेशमार्फत बजेट सार्वजनिक गर्दै बजेट घाटा कम गर्न भारतलाई उत्खनन पदार्थ निर्यात गर्ने बताएका थिए । चुरे क्षेत्रको ९२ स्थानबाट ढुंगा, गिट्टी र बालुवा निकालेर भारत पठाउने सरकारको निर्णयसँगै विरोध हुन थालेको छ ।