काठमाडौँ । कोरोना कहरका कारण स्थानीय प्रशासनले लगाएको निषेधाज्ञाको अवज्ञा गरेको भन्दै चितवनमा ३८८ व्यवसायीलाई कारबाही गरिएको छ । जिल्ला प्रशासन कार्यालयका सूचना अधिकारी खेमराज पौडेलका अनुसार निषेधाज्ञा उल्लंघन गरी व्यवसाय सञ्चालन गर्नेलाई कारबाही गरिएको हो ।

उनका अनुसार उनीहरूलाई हजारदेखि १० हजार रुपैयाँसम्म जरिवाना गरिएको छ । निषेधाज्ञाको समयमा स्थानीय प्रशासनले तोकेको समयभन्दा बढी व्यवसाय सञ्चालन गरेका उनीहरुलाई जरिवाना गराई सम्झाएर पठाइएको उनले बताए ।

यस्तै, निषेधाज्ञाको समयमा विनाकारण बजारमा हिँड्डुल गर्ने ११ हजार ७२० जनालाई होल्डिङ सेन्टरमा राखिएको छ । होल्डमा राखिएकामा मास्क नलगाई हिँड्डुल गर्ने पनि छन् । निषेधाज्ञाको समयमा अनावश्यक रुपमा बजारमा देखिएका ७ हजार ७ सय सवारी साधनलाई कारबाही गरिएको छ ।

निषेधाज्ञा उल्लंघन गर्नेबाट कारबाही स्वरुप २२ लाख ९१ हजार ४ सय रुपैयाँ राजश्व संकलन गरिएको छ । कोरोना भाइरसको संक्रमणका कारण स्थानीय प्रशासनले गत वैशाख १७ गतेदेखि जिल्लामा निषेधाज्ञा जारी गरेको छ । जारी गरिएको निषेधाज्ञा तेस्रो पटकसम्म थप गरिएको समयसमेत यही जेठ २० गते सकिँदैछ ।

कोरोना संक्रमणबाट जिल्लामा २२१ जनाको मृत्यु भएको छ भने १३ हजार ८८९ संक्रमित भएका छन् । सोमध्ये ४ हजार ८४५ जना सक्रिय संक्रमित रहेको स्वास्थ्य कार्यालयले जनाएको छ ।