काठमाडौँ । काठमाडौँको चन्द्रागिरि नगरपालिका १३ स्थित पुरानो नैकापमा पर्खाल भत्किँदा दुई जनाको मृत्यु भएको छ । मृत्यु हुनेमा उदयपुरको बेलुवा ८ की ३५ वर्षीया सीता राई र मकवानपुर राक्सिङ गाउँपालिका ९ का २० वर्षीय टेकबहादुर चेपाङ रहेको महानगरीय प्रहरी प्रभाग बलम्बुका प्रहरी निरीक्षक गणेशचन्द्र कोइरालाले जानकारी दिए ।

प्लटिङ गरेको ठाउँमा लगाइएको ढुंगाको पर्खाल लगाउने क्रमममा बुधबार बिहान पर्खाल खसेको प्रहरीले जनाएको छ । माथिबाट खसेको पर्खालले थिचेर उदयपुरको कटारीका २१ वर्षीय मिलन तामाङ र धादिङको गल्छी गाउँपालिका २ का १८ वर्षीय हरि घले घाइते भएका छन् ।

उनीहरूको मनमोहन अस्पतालमा उपचार भइरहेको प्रहरीले जानकारी दिएको छ । घटनाबारे थप अनुसन्धान भइरहेको उनले बताए ।