काठमाडौं । तेल उत्पादक राष्ट्रहरुको संगठन (ओपेक)ले प्रतिदिन थप २१ लाख ब्यारेल कच्चा तेल उत्पादन गर्ने निर्णय गरेको छ ।

कोरोना भाइरस महामारीको प्रभाव कम देखिन थालेका मुलुकबाट तेलको माग बढेको र तेलको मूल्य बढेका कारण उत्पादन बढाउने निर्णयमा ओपेक पुगेको हो ।

ओपेकका सदस्य एवं तेल उत्पादक राष्ट्रका ऊर्जा मन्त्रीहरु बीच भएको अनलाइन बैठकमा यस्तो निर्णय गरेको हो ।

साउदी अरेबियाका ऊर्जा मन्त्री अब्दुलाजिज बिन सल्मानले पछिल्ला दिनहरुमा बजारमा माग बढेका कारण तेल उत्पादन बढाउने निर्णय सही देखिएको बताए । ऊर्जाको माग र आर्थिक गतिविधिको पुनःउत्थानमा अझै पनि कालो बादल देखिएको उनले दाबी गरे ।

ओपेकले मे देखि जुलाईका तीन महिनाको अवधिमा प्रतिदिन २१ लाख ब्यारेल तेल उत्पादन गर्ने यसअघि नै जनाइसकेको थियो । अब ओपेकले जुनमा प्रतिदिन २ लाख ५० हजार ब्यारेल तथा यो जुलाई महिना लाख ४० हजार ब्यारेल प्रति दिन थप उत्पादन गर्नेछ ।

साउदी अरेबियाले प्रतिदिन १० लाख ब्यारेल पुनः उत्पादन गर्नेतर्फ विचार गर्न थालेको छ । कोभिडका कारण विश्वभर तेलको माग घटेको भन्दै ओपेकको प्रमुख सदस्य साउदी अरेबियाले प्रतिदिन १० लाख ब्यारेल तेल उत्पादन कटौती गर्न राजी भएको थियो ।

साउदी अरेबिया र ओपेकको सदस्य नरहेको रसियाबीच तेल उत्पादनको कोटलाई लिएर केही वर्षदेखि विवाद उत्पन्न हुँदै आएको छ । हाल कोभिडको दोस्रो लहरबाट प्रभावित भारतलगायत मुलुकका कारण तेलको खपतमा कमी आउने आशंका छ ।

तेल उत्पादक राष्ट्रहरुले गतवर्ष सन् २०२० मा कोभिडका कारण तेलको मूल्यलाई स्थायित्व दिन तेल उत्पादन कटौती गरेका थिए । अहिले परिस्थितिमा केही सुधार आएसँगै बिस्तारै तेलको उत्पादन बढाउने तर्फ उत्पादक राष्ट्र लागेका छन् ।

अहिले विश्व बजारमा तेलको मूल्यमा निकै सुधार आएको छ । संयुक्तराज्य अमेरिका, युरोप र एसियामा वर्षको मध्यदेखि ऊर्जाको माग बढ्दैछ । हवाई उडान थपिने भएकाले पर्यटकको आवागमनसँगै तेलको माग थपिने ओपेकको भनाइ छ ।

अमेरिकी कच्चा तेलको मूल्य २ प्रतिशत वृद्धि भई ६७ दशमलव ७२ डलर प्रतिब्यारेल पुगेको थियो । क्रुडको कारोबारमा पनि २ दशमलव ७ प्रतिशतले वृद्धि भई प्रतिब्यारेल ७१ दशमलव १७ डलर कायम भएको थियो । क्रुडको मूल्य विगत दुई वर्षको अवधिमा यो सबैभन्दा बढी हो ।

अमेरिकी कच्चा तेलको मूल्य तीन वर्षयताकै सबैभन्दा बढी हो ।

बुधबार तेलको मूल्यमा सामान्य वृद्धि भएको छ । अमेरिकी बेन्चमार्क १६ सेन्टले वृद्धि भएर प्रतिब्यारेल ६७ दशमलव ८८ डलर कायम भएको छ भने ब्रेन्ट क्रुडको मूल्य १८ सेन्टले वृद्धि भई प्रतिब्यारेल ७० दशमलव ४३ डलर पुगेको छ ।

तेलको मूल्यमा यसवर्षको शुरुदेखि हालसम्म ३० प्रतिशतभन्दा बढीले वृद्धि भइसकेको छ ।