काठमाडौँ । श्रीलंकाको कोलम्बो बन्दरगाह नजिकै आगो लागेको पानीजहाज डुब्न थालेको छ। जहाजमा भएको रसायन र तेलले उक्त क्षेत्रको सामुद्रिक पारिस्थितिक प्रणालीमा गम्भीर असर पर्ने चिन्ता व्यक्त भइरहेको अवस्थामा जहाज डुब्न सुरु गरेको हो ।

भारतबाट सिंगापुरका लागि हिँडेको उक्त जहाजमा दुई साताअघि आगलागी सुरु भएको थियो । श्रीलंकाको कोलम्बो हुँदै सिंगापुर जान लागेको एमभी एक्स प्रेस पर्ल मालवाहक जहाजमा आगलागीपछि बिस्फोट भएको थियो।

भारतको हाजिरा बन्दरगाहबाट एक हजार ४८६ कन्टेनर सामान बोकेको सिंगापुरको ध्वजावाहक उक्त जहाज मे १५ मा छुटेको थियो । २५ टन नाइट्रिक एसिड र अरू रसायन बोकेका कारण जहाज डुबे खतरा हुने आवाज उठेको थियो ।

जहाजको चालक दलमा फिलिपिन्स, चीन, भारत र रूसका २५ जना थिए । श्रीलंका नौ सैनिक गत मंगलबार उनीहरूलाई उद्धार गरेको थियो।

श्रीलंका र भारतीय नौ सैनिकहरूले जहाजको आगो निभाउन प्रयत्न गरे पनि नसकेको समाचारमा जनाइएको छ । एजेन्सी