काठमाडौँ । स्टक एक्सचेञ्जमा आबद्ध कम्पनीको शेयर कारोबार मापक नेप्से परिसुचक कारोबार हुने साताको अन्तिम दिन पनि उकालो लागेको छ ।

बजार परिसुचकमा कारोबारको अन्तिम दुई दिन लगातार उकालो लागेको हो । बिहीबार वाणिज्य बैंक, फाइनान्स कमपनी र विकास बैंक चम्किँदा सेयर बजारमा हरियाली समेत छाएको स्टक एक्सचेञ्जले जनाएको छ ।

बजार परिसुचक २९ दशमलब ५५ अंकले उकालो लागेर २ हजार ८ सय ५६ दशमलब ६७ बिन्दुमा पुगेको छ । यो अघिल्लो दिनको तुलनामा १ दशमलब ५ प्रतिशतले बढी हो ।

कूल २ सय १८ कम्पनीको १ लाख ५५ हजार ६ सय ५५ कारोबारबाट १६ अर्ब ९० करोड ७० लाख २० हजार २ सय ८६ रुपेयाँ बराबरका ३ करोड ४६ लाख ९१ हजार ३ सय १२ कित्ता शेयर किनबेच भएको स्टक एक्सचेञ्जले जनाएको छ ।

बिहिबारको कारोबारमा बैंकतिर लगानीकर्ता आकर्षित हुन थालेकाले सुधार देखिएको हो । केही समय वर्षौसम्म केही नदिने जलविद्युत्मा झुम्मिएका लगानीकर्ता आज विकास तथा बाणिज्य बैंकतिर पाइला चालेको पाइएको छ ।

सचेत लगानीकर्ता बैंकमा फर्किँदा बजारमा उक्त समूह सूचकको सेयर मूल्यमा उछाल आएको छ । खासगरी, वाणिज्य बैंक तथा विकास बैंकमा लगानीकर्ता आकर्षित हुन थालेका छन् ।

बैंकहरुले आम्दानी बढाएको र प्रतिफल पनि राम्रो दिने देखिएपछि केही समयदेखि जलविद्युत्मा झुमिएका लगानीकर्ता विस्तारै बैैंकिङ समूहतिर सिफ्ट भएका हुन् ।

सोझा लगानीकर्तालाई महँगो मूल्यमा सेयर बेचेर नाफा लिए पछि सचेत लगानीकर्ता बैंकतिर लाग्दा बजारमा त्यसको सकारात्मक देखिएको हो ।

लगानीकर्ताले कम्पनीको वास्तविक वित्तीय अवस्था नहेरी सेयरमा लगानी गर्दा राम्रा कम्पनीको सेयर मूल्य बढ्न सकेको थिएन ।