काठमाडौँ । चुरे क्षेत्रको नदीजन्य खनिज पदार्थ भारतमा निकासी गरी आर्थिक घाटा कम गर्नेबारे चौतर्फी विरोध उत्पन्न भएसँगै राष्ट्रिय प्रजातन्त्र पार्टी (राप्रपा)का अध्यक्ष कमल थापाले सरकारले आफ्नो धारणा स्पष्ट पार्नु पर्ने बताएका छन् । उनले सरकारले यसबारे सबैलाई स्पष्ट बनाउनु पर्ने माग राखेका हुन् ।

गत जेठ १५ गते सरकारले प्रस्तुत गरेको आर्थिक बजेट २०७८–८९ देशको आर्थिक घाटा कम गर्न चुरे क्षेत्रको खानीजन्य ढुंगा, गिटी र बालुवा निकासी गरी व्यापार घाटा न्युनीकरण गरिने उल्लेख गरेको छ ।

‘खानीजन्य पदार्थको निकासी गरी व्यापार घाटा न्युनीकरण गरिने सरकारी नीतिले सर्वत्र आशंका, भ्रम र चिन्ता पैदा भएको छ, यसबारे सरकारले आफ्नो धारणा स्पष्ट गर्नुपर्छ,’ अध्यक्ष थापाले भने, ‘वातावरणीय सन्तुलन विगार्ने तथा तराई–मधेस र भित्री मधेसलाई मरुभूमिकरण गर्ने कुनै पनि कार्य स्वीकार्य हुँदैन ।’