कैलाली । नेकपा एमाले सुदूरपश्चिम प्रदेश संसदीय दलका नेता तथा आर्थिक मामिला तथा योजनामन्त्री प्रकाश शाहलाई एमाले अध्यक्ष केपी शर्मा ओलीले स्पष्टीकरण सोधेका छन् । बिहीबार अध्यक्ष ओलीले शाहलाई ४८ घण्टे स्पष्टीकरण सोधेको एमाले प्रदेश अध्यक्ष कर्ण थापाले जानकारी दिए ।

यसअघि शाहलाई प्रदेश कमिटीले स्पष्टीकरण सोधेको थियो ।एमालेको जेठ १० गते बसेको स्थायी कमिटी बैठकले सुदूरपश्चिम प्रदेश सरकारलाइ दिएको समर्थन फिर्ता लिएको थियो । त्यस्तै, प्रदेश सरकारमा रहेका तत्तकालीन तीन मन्त्रीलाई सरकारबाट फिर्ता हुन निर्देशन दिएको थियो । तर, केन्द्रको निर्देशन अटेर गर्दै प्रदेश संसदीय दलले सरकारबाट फिर्ता नभएर मन्त्री थप गरेको थियो ।

शाहलाई पार्टी केन्द्रले समर्थन फिर्ता लिइसकेको अवस्थामा विपक्षी दलको सरकारमा किन मन्त्री रहको भन्ने सोधिएको छ । त्यस्तै, गुटका भेलामा सहभागी हुने र अरूलाई समेत सहभागी हुन उत्प्रेरित गरेको स्पष्टिकरणमा आरोप लगाइएको छ । शाहलाई एमाले सुदूरपश्चिम प्रदेश संसदीय दलको विधानको आधारमा पार्टीको साधारण सदस्य समेत नरहने गरी किन निष्कासन नगर्ने भन्दै ओलीले चित्तबुझ्दो जवाफ मागेका छन् ।