काठमाडौं । माधव नेपाल समुहमा रहेर केपी ओलीसँग नजिक हुन खोजेको र माधव नेपाललाई नै कमजोर बनाउन लागि परेको आरोप आफ्नै विचार समुहभित्र लागेपछि योगेश भट्टराई र घनश्याम भुषालले आज त्यसबारेमा आफ्नो धारणा राखेका छन् ।

हिजोदेखि शुरु भएको नेपाल समुहको केन्द्रीय सदस्यहरुको भर्चुअल बैठकमा आफनो धारणा राख्दै नेताद्दय भट्टराई र विष्टले पार्टी एकतामै जोड दिएर जानुपर्ने बताएका हुन् ।

नेताद्दयले अन्तिम समयसम्म एमालेको एकताका लागि पहल गर्नुपर्ने धारणा बैठकमा राखेको नेपाल पक्षका एक केन्द्रीय सदसयले मेरो न्यूजलाई जानकारी दिए ।

नेताद्दयले ओलीले टेक्ने ठाँउ दिँदा सम्म एमालेमै रहनुपर्ने र त्यहीभित्रबाट संर्घष गर्नुपर्ने धारणा राखेका हुन् । ‘एमाले विभाजन हुँदा मुलुक, संविधान र व्यवस्था संकटमा पर्छ। त्यसकारण पनि पार्टी एकताको लागि अन्तिम प्रयास हुनुपर्छ’ नेताद्दयको एउटै साझा भनाई थियो,–‘अहिलेको नीति भनेको एकता, संघर्ष र रुपान्तरण नै हो। ओलीले टेक्ने ठाउँ दिँदासम्म एमालेमै रहनुपर्छ। एकता गर्ने भनेको आत्मसर्पण गर्ने होइन। पार्टीभित्र रहेर कब्जा गर्ने हो।’

ओली पक्षका नेताहरुसँग योगेश, गोकर्ण सगै घनश्याम भुषाल र सुरेन्द्र पाण्डेले अनौपचारिक÷औपचारिक छलफल गरिरहेका थिए । उनीहरुले गरिरहेको त्यस्तो खालको छलफलमा माधव नेपाल पक्षभित्रै आलोचना भईरहेको थियो ।

छलफलमा रहेका घनश्याम र सुरेन्द्रले भने हिजो धारणा राखेका थिए । ‘अन्तिमसम्म एकता प्रयास गर्ने हो, तर ओलीले बार्ताका नाममा भुलाउन खोजेकोले यसमा सचेत हुनुपर्ने’ धारणा सुरेन्द्र र घनश्यामले ब्यक्त गरेका थिए ।

तर विष्ट र भट्टराईले भने एमाले विभाजन गर्न देशी/विदेशी सम्म लागिपरेकोले एकताकै लागि जोड गर्नुपर्ने धारणा राखेका हुन् । आफुहरुले नेता माधव नेपाललाई औपचारिक/अनौपचारिक जानकारी दिएरै ओली पक्षका नेताहरुसँग छलफलमा बसेको पनि वताएका थिए ।
नेताद्दयले आफुहरुले गरेको प्रयासबाट पार नलाग्ने देखियो भने सबै बसेर नयाँ निष्कर्षमा जाउँला भन्दै अहिले नयाँ पार्टी बनाउने तिर सोच्नै नहुने बताएका थिए ।