काठमाडौँ । प्रधानन्यायाधीश चोलेन्द्र शमशेर राणाले ओली पक्षका वकिलले निवेदन फिर्ता नलिए मानहानीको मुद्दा चलाउने चेतावनी दिएका छन् । संवैधानिक इजलासमा ओली पक्षका वकिल राजाराम घिमिरेले न्यायाधीशहरूले मुद्दा हेर्न नमिल्ने भन्दै निवेदन दिएका थिए ।

उक्त निवेदन फिर्ता लिन आग्रह गर्दै राणाले नलिए मानहानीको मुद्दा चलाउने चेतावनी दिएका हुन् । राणाले संयमित हुन सबैमा अनुरोध गर्दै निवेदन फिर्ता नलिए कठिन रुपमा मानहानीको मुद्दा चलाउने बताएका हुन् । उनले इजलासको मर्यादा कायम राख्नुपर्ने र इजलासको विश्वास पनि गर्नुपर्ने बताए ।

इजलासमा राजारामसहित यज्ञमणि न्यौपाने र दीपक मिश्रले पुरक निवेदन लगेका हुन् । राजारामले निवेदन दर्ता नै हुनुपर्ने जिकिर गरेका छन् । राणाले आइतबार प्रतिनिधिसभा विघटनविरुद्धको रिटमा वरिष्ठताका आधारमा संवैधानिक इजलास गठन गरेका थिए ।

संवैधानिक इजलासमा राणासहित न्यायाधीश दीपककुमार कार्की, मीरा खड्का, ईश्वरप्रसाद खतिवडा र आनन्दमोहन भट्टराई रहेका छन् ।