काठमाडौँ । नेकपा एमाले वरिष्ठ नेता झलनाथ खनाल र माधवकुमार नेपाल समूहले आफूहरुको माग पूरा गर्ने विश्वसनीय आधार नभए वार्ताका नाममा अल्झिन नहुने बताएको छ ।

संविधानको रक्षा र लोकतन्त्रका लागि बाध्य भएर वैकल्पिक बाटो अवलम्बन गर्नुपर्ने खनाल र नेपाल समूहले निष्कर्ष निकालेको छ । केन्द्रीय सदस्यहरुको भर्चुअल बैठकमा आफूहरुका माग कार्यान्वयन हुने गरी सहमति सार्वजनिक भए मात्र अध्यक्ष केपी शर्मा ओली एकताको पक्षमा रहेको ठहरिने नेपाल पक्षको निष्कर्ष छ ।

अन्यथा असंवैधानिक कार्यका विरुद्ध देशका प्रमुख राजनीतिक दलहरु कानुनी र राजनीतिक रुपमा संघर्षरत रहेको स्थितिमा अनिश्चित र परिणामविहीन वार्ता र एकताको नाममा षड्यन्त्र र जालझेलमा अलमलिन नहुने बैठकको निष्कर्ष रहेको छ । नेपालको संविधान, पार्टीको विधान, कम्युनिस्ट आन्दोलन र लोकतन्त्रको रक्षाका लागि बाध्य भएर वैकल्पिक बाटो अवलम्बन गर्नुपर्नेमा नेपाल पक्षको जोड रहेको छ ।