काठमाडौँ । नवनियुक्त उपप्रधानमन्त्री राजेन्द्र महतोले दिएको अभिव्यक्तिसहित सरकारको गतिविधिलाई लिएर ७ विद्यार्थी संगठनले संयुक्त विज्ञप्ति जारी गरेको छ । विद्यार्थी संगठनहरू नेपाल विद्यार्थी संघ, अखिल (क्रान्तिकारी), अनेरास्ववियू, अखिल (पाँचौ)लगायत संगठनले विज्ञप्ति जारी गरेका हुन् ।

संगठनका अध्यक्षहरू राविज ढुंगाना, रञ्जित तामाङ, सुदेश पराजुली, विमला पोखरेल, हरिकृष्ण गजुरेल, चिरञ्चिवी ढकाल धनश्याम मिश्रले हस्ताक्षर गरेको विज्ञप्तिमा सरकारले गत जेठ १५ गते प्रस्तुत गरेको आर्थिक वर्ष २०७८–८९ को १९९ बुँदाको विरोध गरेका छन् । यस बुँदामा ‘खानीजन्य ढुंगा, गिटी, बालुवा निकास गरी व्यापार घाटा न्यूनीकरण गरिने’ बारेमा पनि विरोध जनाएका छन् । विद्यार्थी संगठनहरूले सरकारको यस कदमले माफियाहरूबाट चुरे क्षेत्र दोहन हुने भन्दै तत्काल खारेज गर्न माग गरेका छन् ।

भर्चुअल माध्यमबाट बसेको बैठकले बारम्बार पेट्रोलियम पदार्थको मूल्य वृद्धि र झापाको बी एण्ड सी मेडिकल कलेजलाई दिएको सम्बन्धनसमेत खारेज गर्न माग गरेका छन् । यसैगरी, त्रिभुवन विश्वविद्यालयले कोरोना महामारीमा लिन लागेको परीक्षाको उचित व्यवस्थापनमा जोड दिन आग्रह गरिएको छ ।