काठमाडौं । निषेधाज्ञा बेला पनि भीडभाड हुने यो ठाउँ हो, क्षेत्रपाटी। यो काठमाडौंको औषधि थोक बजार हो । यहाँ आएपछि औषधी किन्न आउनेको भीडले निषेधाज्ञा छ भन्ने नै भुलाउँछ ।

अरूतिर पसलमा चौबीसै घन्टा ताल्चा लागेका बेला यहाँ बिहान १० बजे नै धमाधम सटर खुल्छन्। व्यापार अरू बेलाजस्तै छ।

क्रेताहरू सामान किनिरहेका हुन्छन्, बिक्रेता बेचिरहेका हुन्छन्। सामान किनबेच र ओसार पसारले गर्दा चहलपहल निकै हुने गरेको छ ।

कतै सामान लोड भइरहेका छन्, कतै अनलोड गरिँदैछ। अहिले कोरोना संक्रमणबाट बच्न मास्क, स्यानिटाइजर, अक्सिमिटरदेखि विभिन्न किसिमका औषधिको माग बढेको छ।

उपत्यकाभित्र र बाहिरबाट समेत माग आउने क्रम बढेको बिक्रेता बताउँछन्। क्षेत्रपाटीका यी थोक पसलबाट देशभरका अस्पताल र मेडिकलमा औषधि आपूर्ति हुँदै आएको छ।