काठमाडौँ । फिफा विश्वकप(२०२२ तथा एसियन कप(२०२३ अन्तर्गत दोस्रो चरणको छनोटमा नेपालले आज (सोमबार) बलियो टिम जोर्डनसँग प्रतिस्पर्धा गर्दैछ । खेल राति ९:४५ बजे कुवेत सिटीस्थित जाबेर अल अहमद अन्तराष्ट्रिय स्टेडियममा हुनेछ ।

नेपाली राष्ट्रिय फुटबल टिमका मुख्य प्रशिक्षक अब्दुल्लाह अलमुताईरीले टिमको लक्ष्य जित निकाल्ने रहेको बताईसकेका छन् । उनले हरेक खेल सुन्यबाट सुरु हुने भएकाले परिणाम मैदानको प्रदर्शनमा निर्भर पर्ने बताए ।

प्रि(म्याच कन्फरेन्समा प्रशिक्षक अलमुताईरीले भने, “हाम्रो लक्ष्य एसियन कपमा छनोट हुनु हो । यसका लागि जोर्डनविरुद्ध जित आवश्यक छ ।” अघिल्लो खेलमा चाईनिज ताईपेलाई २–० ले हराएको नेपाल उच्च मनोबलसहित मैदान उत्रने छ । हामीले जोर्डनका लागि त्यतिनै तयारी गरेका छौं, उनले भने ।

छनोटको समूह बीमा रहेको नेपालले ६ खेलमा ६ अंक जोडेको छ । नेपाल तालिकाको चौंथो स्थानमा रहेको छ । जोर्डन ५ खेलमा १० अंक जोडेर तेस्रो स्थानमा रहेको छ । नेपालले विश्वकप छनोटको तेस्रो चरणमा पुग्ने मौका गुमाईसकेको छ । तर नेपाललाई बाँकी खेलमा जित निकाल्दै एसियन कप छनोटको तेस्रो चरणमा स्थान बनाउने अवसर रहेको छ ।

नेपालले जोर्डनविरुद्ध हालसम्म तीन पटक खेलेको छ । जसमा दुई खेल गुमाएको छ । एक खेल भने बराबरी खेलेको छ । हेड टु हेड– विश्वकप छनोट अन्तर्गत नै नेपालले सन् २०११ को जुलाईमा जोर्डनसँग खेलेको थियो ।

जुलाई २३ मा जोर्डनको मैदानमा भएको खेलमा नेपाल ९–० ले पराजित भएको थियो । तर, २०११ को जुलाई २८ मा नेपालमा भएको खेलमा नेपालले जोर्डनलाई १–१ गोलको बराबरीमा रोकेको थियो । त्यहि नै जोर्डनविरुद्ध नेपालको सुखद नतिजा हो । पछिल्लो पटक नेपालले जोर्डनसँग २०१९ को अक्टोबरमा खेलेको थियो ।