काठमाडौँ । सुदूरपश्चिम प्रदेश सरकारका मुख्यमन्त्री त्रिलोचन भट्टले मंगलबार प्रदेशसभा नियमावली २०७४ को नियम १४३ को उपनियम ४ बमोजिम विश्वास मत पाएका छन् ।

मुख्यमन्त्री भट्टले एमालेभित्रको विवादका कारण विश्वासको मत लिने घोषणा गरेका थिए । तर, एमालेकै सांसदका कारण मुख्यमन्त्रीमा भट्ट जोगिएका हुन् ।

प्रदेशसभामा भएको मतविभाजनमा मुख्यमन्त्रीको पक्षमा ३० मत खसेको थियो । यस्तै, विपक्षमा ९ मत पर्यो भने कांग्रेसका १२ सांसद मतदान प्रक्रियामा सहभागी भएका थिएनन् ।

मुख्यमन्त्रीलाई माओवादीसहित एमालेले समर्थन गर्ने निर्णय भएको थियो भने कांग्रेसले आवश्यकताअनुसार विश्वासको मत दिने निर्णय गरेको थियो । मुख्यमन्त्रीको पक्षमा विश्वासको मत पुग्ने भएपछि कांग्रेसले मत नहालेको स्रोतले जनाएको छ । ५२ सदस्यीय प्रदेशसभामा विश्वासको मतका लागि २७ जनाको समर्थन आवश्यक रहेको थियो ।

प्रदेशसभामा मुख्यमन्त्री भट्टको दल माओवादीका १३ सांसद छन् र एमालेका नेता माधव नेपाल पक्षका सांसदको मतसहित ३० मत पक्षमा खसेको हो । एमालेका २५ सांसदमध्ये ७ जनामात्र ओली पक्षका छन् ।