काठमाडौँ । कुवेत भ्रमणमा रहेको नेपाली फुटबल टोली आइतबार साँझ स्वदेश फर्किएको छ । भ्रमणमा नेपाली टोलीले विश्वकप र एसियन कप छनोटका लागि केही खेलहरू खेलेको थियो ।

भ्रमणमा नेपाली टोलीले आफ्नो पक्षमा सुखद् निकाल्न सकेन । तर, अघिल्ला भ्रमणभन्दा योपटक उपलब्धिमूलक रहेको नेपाली टोलीका कप्तान किरण चेम्जोङले बताए । उनले विगतका खेलहरूमा भन्दा राम्रो प्रदर्शन गरेको बताएका छन् । उनले सधै रक्षात्मक रणनीति अपनाउने नेपालले यो भ्रमणमा आक्रामक खेल्न सक्छ भन्ने उदाहरण दिएको बताए ।

समूह तालिकाको चौथो स्थानमा रहँदै कतार विश्वकप छनोट यात्रा समाप्त हुँदा २०२३ चीनमा एसियन कपको झिनो आशा प्ले अफमात्रै बाँकी छ । कोरोना भाइरस महामारी नभएको भए कुवेतमा हुने खेलहरू त्रिपुरेश्वरस्थित दशरथ रंगशालामा नेपाली दर्शक माझ हुने थियो ।

कुवेतका प्रशिक्षक अबदुल्लाह अलमुताइरीले नेपाली राष्ट्रिय टोली सम्हालेसँगै विगतको खेल्ने शैलीभन्दा फरक देखिएको कप्तान चेम्जोङले बताएका छन् । साथै प्रशिक्षक अलमुताइरीले नेपाली टोली कुवेत भ्रमण गर्दा बलिया टोलीसँग प्रतिस्पर्धात्मक खेल देखाउन सक्छन् भन्ने मानसिकता थपिदिएका छन् । नेपाल फर्किएपछि कप्तान किरण चेम्जोङसँग गरिएको कुराकानीको अंश :

समग्रमा कुवेत भ्रमण कस्तो रह्यो ?

कुवेत भ्रमणको समयमा खेलिएको तीन वटा खेल हेर्दा, टिमले धेरै सकारात्मक खेलेको छ । टिममा गएपछि सुधारिएको खेल देखेको छ । सकारात्मक र नकारात्मक दुवै पक्षलाई नियाल्नु पर्छ । सकारात्मक कुराहरुलाई ध्यान दिनुपर्छ ।

विशेष हामीले हाम्रो बलियो पक्षलाई केलाउँदै अगाडि बढ्नु पर्छ । आउँदा दिनमा सकारात्मक विषयमा विशेष ध्यान दिनु पर्छ । यसरी नै अगाडि बढ्दा नेपालको फुटबल विकासले गति लिन सक्छ ।

चाइनिज ताइपेइसँग राम्रो खेले पनि जोर्डन र अस्ट्रेलियासँगको खेल राम्रो हुन सकेन नि । हामी कहाँ चुक्यौँ ?

पहिलो खेल चाइनिज ताइपेइसँग थियो । ताइपेइको घरेलु मैदानमा खेल्न जाँदा त्यो समयमा टोली निकै बलियो थियो । दोस्रो लेगमा पनि सुखद नतिजा निकाल्न हामी पूर्ण रुपमा तयार थियौँ । कुवेत जानुअघि इराक भ्रमण गरेर लिएको उपलब्धिले हाम्रो मनोबल बढ्यो । पहिलो खेल चाइनिज ताइपेइसँगको तयारी राम्रो भएकाले नतिजालाई निरन्तर दिन सक्यौँ ।

भ्रमणमा रहेका कोच र एसिस्टेन्ट कोचले हाम्रो खेललाई राम्रोसँग नियाल्नु भएको थियो । जित्नुको विकल्प हामीलाई थिएन । सोहीअनुसार कोचले दिएको निर्देशनलाई खेल अवधि भर पालाना गर्याैं । पेनाल्टीबाट अग्रता लिएसँगै खेलाडीमा हौसाल मिल्यो । पछि दोस्रो गोल पनि निष्कियो । बलमा पकड जमाउँदै दबाब दिएर खेल्यौँ । राम्रो खेल्यौँ ।

दोस्रो खेल जोर्डनसँग उसैको मैदानमा खेलेका थियौँ । टफ म्याच थियो । पहिलो खेलमा गोलको मार्जिन धेरै लागेको थियो । पहिलो खेलमा पेनाल्टीबाट हामीपछि परेका थियौँ । दोस्रो लेगमा पनि सोही अवस्था भयो । नचाहँदा नचाहँदै गल्ती भयो । मानवीय त्रुटि र फुटबलको पाटो हो । जोर्डनसँगको खेलमा पनि पुरानो गल्ती भयो । सामान्य गल्तीले खेल गुमाउन पुग्यो । सुधारको प्रयास गरे पनि अलमलमा पर्याैं ।

यद्यपि, जोर्डनसँगका कमजोर पक्ष केलाउँदै खेल्ने प्रयास गरे पनि सफल हुन सकेनौँ । अंक खोस्ने लक्ष्यका साथ मैदान उत्रिएका थियौँ । ३–० ले नै हार्ने सोच थिएन, तर खेलमा सोही नतिजा दोहोरियो । समग्रमा प्रदर्शनले राम्रा गरेका हौँ ।

विश्वकपको अनुभव लिएको अस्ट्रेलियासँगको खेललाई कसरी लिनु भएको छ ?

विश्वकप खेलेर अनुभव लिइसकेको अस्ट्रेलियासँग खेल्न पाउनु हाम्रो लागि मौकाको कुरा हो । पहिलो खेलभन्दा दोस्रो लेग फरक थियो । पहिलो लेगमा फिल्ड सेयर गर्न पाउनु हामीलाई उपलब्धिमूलक थियो । पहिलोमा हामी अनुभव बटुल्ने लक्ष्यमा थियौँ भने दोस्रो लेगमा प्रतिस्पर्धात्मक फुटबल खेल्ने लक्ष्य राखेका थियौँ । सोहीअनुसार तयारी पनि गरेका थियौँ ।

पहिलो हाफमा १० खेलाडीमा सिमित भए पनि सम्रग टोली एक बनेर खेल प्रदर्शन गर्न सफल भयौँ । ‘वान म्यान डाउन’मा पनि हामीले बलियो अस्ट्रेलियालाई रोक्यौँ । अस्ट्रेलियासँगको खेलमा टिम मेट्सले गरेको प्रदर्शनमा निकै सन्तुष्ट छु । तारिफ गर्न चाहन्छु । तारिफ योग्य खेल रह्यो । राम्रो खेल्यौँ । अस्ट्रेलियासँगको दोस्रो लेग पनि राम्रो भयो । सुखद नै मान्नु पर्छ ।

एसियाको पावर हाउससँग खेल्न पाउँदा हाम्रो लागि अनुभव भयो । आउँदा दिनमा अब अन्य एसियाका पावर हाउससँग खेल्नु पर्छ र पाउँ भन्ने हाम्रो अपेक्षा छ । कोरिया, जापान, इरान जस्ता टोलीसँग खेल्न पाए हुन्थो । नतिजा जे होला केही फरक पर्दैन । पहिलो खेल गुमाए पनि दोस्रो खेलमा सुधारका अवसर पाउँछौँ । यसरी आउँदा दिनमा बलियो टोलीसँग खेल्न पाउँदा नेपाली फुटबलको स्तर सुधारिन्छ भन्ने मेरो विश्वास छ ।

जितका लागि खेल्नुभन्दा यस्ता खेलले सुधारका लागि धेरै सहयोग गर्छ । सधै हार्छ भन्ने आँकलन भए पनि नेपालले प्रतिस्पर्धात्मक फुटबल खेल्न सक्छ भन्ने सन्देश विश्वभर जान्छ । ठूलो अन्तरले हारे पनि दोस्रोपटक आमने सामने हुने अवसर पाउँदा सुधारिएको खेल देखायो भन्ने सन्देश दिन सक्छौँ भन्ने अस्ट्रेलियासँगको खेलले प्रमाणित गरेको छ ।

अस्ट्रेलियाका प्रशिक्षकले पनि हाम्रो खेलको तारिफ गरेका छन् । यस्तै, बलियो अस्ट्रेलियासँग आउँदा दिनमा खेल्न पाए स्कोर गर्न सकिन्छ भन्ने विश्वास छ । समग्रमा अन्तिम खेल राम्रो मान्छु ।

प्रशिक्षक अल्मुताइरीको रणनीति भ्रमणमा सफल भएको हो ?

कोचले मात्र सम्भव हुँदैन । टोलीले युनाइटेड खेल देखाउँदा नतिजा निक्लने हो । कोचको निर्देशनले धेरै अर्थ राख्छ । नयाँ कोचले वे देखाउने हो । नेपाली टोलीलाई सम्हाल्नु भएका नयाँ प्रशिक्षक अबदुल्लाहले सबै खेलाडीको माइन्डमा ‘वि क्यान प्ले फुटबल’ भरिदिनु भएको छ ।

यस्तो वातावरण सबै खेलाडीको दिमागमा राख्दिनु भएको छ । जति बलियो प्रतिद्वन्द्वी भए पनि हामीले फुटबल खेल्न सक्छौँ भन्ने मानसिकता भरदिनुभएको छ । नतिजा जे भए पनि एट्याकिङ फुटबल खेल्नु पर्छ । उहाँको प्रेरणाले नयाँ खेलाडीमा प्रतिस्पर्धात्मक खेल खेल्न सक्छौँ भन्ने मानसिकता विकास भएको छ ।

नयाँ खेलाडीमा फाइटिङ स्प्रिट विकास भएको छ । प्रशिक्षको मात्रभन्दा पनि समग्र टिमको प्रदर्शन रह्यो । प्रशिक्षकको योजना फुटबललाई एक स्टेपमाथि लैजाने लक्ष्य रहेको छ । सोहीअनुसार उहाँले परिक्षण गर्नु भएको छ । त्यसका लागि हामीले उहाँलाई साथ दिएका छौँ ।

आगामी दिनमा नेपाली टोलीले थप सफलता हात पार्न कस्तो किसिमको योजना आवश्यक छ ?

खेलाडीहरु सधै व्यस्त हुनु पर्यो । व्यस्त तालिका पनि हुनु पर्छ । शीर्ष डिभिजनका लिगहरु निरन्तर हुनु पर्यो । पहिलोपटक फ्रेन्चाइज फुटबल प्रतियोगिता सम्पन्न भएको छ । सम्पन्न एनएसएलले खेलाडीमा राम्रो सन्देश दिएको छ । खेलाडीलाई एनएसएल राम्रो भएको छ । यस्ता प्रतियोगिताले नेपाली खेलाडीलाई व्यस्त र अवसर खेज्नका लागि निकै मद्दत गरेको छ । लिगहरू लामो समयसम्म हुनु पर्छ ।

राष्ट्रिय खेलाडीलाई अन्तर्राष्ट्रिय भ्रमण गराएर व्यस्त गराउनु पर्छ । फुटबल खेलाडीलाई फुटबलमा नै व्यस्त बनाउनु पर्छ । हामीभन्दा माथिल्लो र तल्लो स्तरको देशहरुसँग बारम्बार मैत्रीपूर्ण खेल खेलाउनु आवश्यक छ । सबैभन्दा ठूलो कुरा खेलाडीलाई व्यस्त राख्नु हो । यसले नेपाली फुटबलको नतिजा राम्रो हुन्छ । खेलाडीका लागि हौसला मिल्छ ।

ठूलो टोलीसँगको पटक पटक खेल्न पायौं भने अवश्य नै हामीले सुधाएिको खेल देखाउँन सक्छौँ । कमी कमजोरीलाई नियाल्न सक्छौँ । अनुभव हुन्छ, पहिलो, दोस्रो अनि तेस्रो खेलमा सुधार अवश्य देखिन्छ ।

एन्फा र नेपाल सरकारले खेलाडीलाई व्यस्त बनाइराख्ने तालिका बनाउनु पर्छ । ठूलो क्लब, लिग खेल्ने क्लबदेखि माथिल्लो स्तरको टोलीसँग खेल्ने अवसर दिनु पर्छ । यस्ता अवसरले खेलाडीलाई अनुभवी बनाउँछ ।