काठमाडौँ । केही दिनदेखि परेको अविरल वर्षाका कारण देशका विभिन्न जिल्लाहरूमा पहिरो जाने क्रम बढेको छ । यससँगै ऊर्जा जल स्रोत तथा सिंचाई मन्त्रालयले सबैलाई सचेत हुन आग्रह गरेको छ ।

मन्त्रालयले पछिल्लो २४ घण्टामा तराईका विभिन्न जिल्लाहरूको नदी किनारामा बस्दै आएका सर्वसाधरणलाई सचेत हुन आग्रह गरेको छ । केही दिन भारी वर्षा हुने भएकाले मन्त्रालयले सचेत हुन आग्रह गरेको छ ।

‘चितवन, नवलपुर, पश्चिम नवलपरासी, रुपन्देही, पाल्पा, कास्की, म्याग्दी र आसपासका जिल्लाहरूमा भारी वर्षामापन भएको र थप वर्षा हुने पूर्वानुमान गरिएको छ,’ मन्त्रालयले भनेको छ, ‘नदीको तटीय क्षेत्र, कमजोर तथा भिरालो जमिन र डुबान भइरहने होचो स्थानमा आज रातिसम्म उच्च सतर्कता अपनाऔँ ।’

वर्षाका कारण पूर्व–पश्चिम राजमार्ग अवरुद्ध भएको छ । यस्तै देशका विभिन्न स्थानहरूमा बस्ती डुबानमा परेको मन्त्रालयले जनाएको छ ।