काठमाडौँ । केही दिनदेखि परेको अविरल वर्षाका कारण देशका विभिन्न जिल्लामा ठूलो धनजनको क्षति भएको छ । जसमा सिन्धुपाञ्चोक, मनाङलगायत जिल्लामा मानिसहरू बेपत्ता भएका छन् । उनीहरूको खोजी कार्य भइरहेको छ ।

सिन्धुपाल्चोकको मेलम्ची नदीमा आएको बाढीमा बेपत्ता भएका ८ जनामध्ये एक जनाको शव भेटिएको छ । जिल्ला प्रशासन कार्यालयका सहायक प्रमुख जिल्ला अधिकारी बाबुराम खनालले हराएकामध्ये एक जनाको शव भेटिएको जानकारी दिएका हुन् । उनका अनुसार ७ जनाको अवस्था पत्ता लगाउन सकिएको छैन ।

घटनास्थलमा अहिले सभामुख अग्निप्रसाद सापकोटा पुगेका छन् । उनले बाढी पहिरोबाट भएको क्षति अवलोकन र राहत तथा उद्धारका लागि पहल गरिरहेका छन् ।

यस्तै, बाढी पहिरोले मनाङका सयौँ घर डुबानमा परेका छन् । मनाङ सहायक प्रमुख जिल्ला अधिकारी शारदा चालिसेले मनाङ चामेबजारका बाढी पस्दा करिब ३ सय जनाभन्दा बढी सम्पर्कविहीन भएका छन् ।

कालीगण्डकी नदीमा आएको बाढीले म्याग्दीको सदरमुकाम बेनीमा कटान गरेको छ । यसैगरी, राष्ट्रिय गौरवको आयोजना कालीगण्डकी करिडोरको बागलुङ खण्डअन्तर्गत गलुवामा ठूलो पहिरो खसेको छ ।

वर्षासँगै आएको बाढीले देशका विभिन्न राजमार्गहरू अवरुद्ध भएका छन् ।