काठमाडौँ । गण्डकी प्रदेशका मुख्यमन्त्री कृष्णचन्द्र नेपाली पोखरेलले विश्वासको मत पाएका छन् । गण्डकी प्रदेशमा आज बसेको बैठकमा ५८ जना सांसद सहभागी भएका थिए । जसमा पोखरेलले ३१ सांसदको मत पाएका हुन् ।

गत जेठ २९ गते संविधानको धारा १६८ को उपधारा ५ बमोजिम मुख्यमन्त्री नियुक्त भएका उनले आज विश्वासको मत लिएका हुन् । नेकपा एमालेका तत्कालीन मुख्यमन्त्री पृथ्वीसुब्बा गुरुङले विश्वासकाे मत नपाएर पदबाट बाहिरिएसँगै गठबन्धन पक्षबाट पोखरेल मुख्यमन्त्री बनेको थिए ।

मुख्यमन्त्री बन्नका लागि पोखरेललाई आफ्नो पार्टी नेपाली कांग्रेससहित, नेकपा माओवादी केन्द्र, जनता समाजवादी पार्टी (जसपा), राष्ट्रिय जनमोर्चा र एक स्वतन्त्र सांसदले साथ दिएका हुन् । उनको पक्षमा नेपाली कांग्रेसको १५, माओवादी केन्द्रको सभामुखसहित ११, राष्ट्रिय जनमोर्चाको २ र जनता समाजवादी पार्टीको २ र स्वतन्त्र सांसद १ गरी कूल ३१ मत पाएका हुन् । यस्तै, विपक्षमा २७ मत खसेको छ ।

मुख्यमन्त्री नियुक्त भएको ३० दिनभित्र प्रदेशसभाबाट विश्वासको मत लिनु पर्ने संवैधानिक प्रावधान रहेको पनि उनले आज विश्वासको मत लिएका थिए ।