काठमाडौँ । लगातार भएको वर्षासँगै पहिरोले मनाङमा मर्स्याङ्दी नदी थुनिँदा चामे बाजार उच्च जोखिममा परेको छ । गाउँपालिकाको वडा नम्बर ४ र ५ जोड्ने स्थानमा मर्स्याङ्दी नदीमा पहिरो खसेको जिल्ला प्रसाशन कार्यालय मनाङले जनाएको छ ।

निरन्तर वर्षा भइरहेकाले नदीमा पानीको बहाव बढ्न सक्ने भएकाले चामे बजार उच्च जोखिममा रहेको जिल्ला प्रशासन कार्यालय मनाङले जानकारी दिएको हो ।

चामेको बजार क्षेत्र हुँदै झरेको घट्टेखोलाले ढुंगा माटो र काठदाउरा बगाएर ल्याएपछि मर्स्याङ्दी नदी थुनिएको हो । माथिबाट झरेको पहिरो, ढुङ्गा माटो र काठ दाउराले मर्स्याङ्दी नदी थुनिँदा पानी जमेर ड्याम बनेको छ ।

चामेको पारिपट्टिको भाग डुबानमा परेको छ । सिंगो चामे बजार जोखिममा परेको प्रशासनले जनाएको छ । बाढीले चामेबाट माथिल्लो मनाङतर्फ जाने एकमात्र बेलीब्रिज समेत कटान गरी लगेको छ ।

थुनिएको नदी नेपाली सेनाले बम विस्फोट गराएर खुलाउने तयारी गरिए पनि सकेको छैन । प्रशासनले चामे क्षेत्रका स्थानीयवासीलाई सतर्क रहन आग्रह गरेको छ ।

सुरक्षाका सबै निकायसँग समन्वय गरी खुलाउने प्रयास भइरहेको छ ।