काठमाडौँ । मनाङको बाढीपहिरो पीडितका लागि राहत लिएर गएको नेपाली सेनाको हेलिकप्टर मौसम खराबका कारण सदरमुकाम चामेमा रोकिएको छ । विघटित प्रतिनिधिसभा सदस्य पोल्देन छोपाङ गुरुङसहित स्थानीय तहका पदाधिकारी सवार हेलिकप्टर राहत लिएर मनाङको बाढी प्रभावित क्षेत्रमा पुगेको हो ।

मनाङको विभिन्न स्थानका बाढी पीडितका लागि राहत लिएर आएको हेलिकप्टरमा इन्धन राख्न पोखरा लागि उडेको थियो । तर मौसम खराब भएकाले पुनः सदरमुकाम चामे नै फर्किएको हो ।

बाढी पीडितलाई दैनिक उपभोग्य सामग्रीसहित तत्कालका लागि आवश्यक पर्ने त्रिपाल, टेन्ट, म्याटलगायतका राहत सामग्री ल्याइएको जनाएको छ ।

गएको मंगलबार मनाङको विभिन्न स्थानमा भीषण वर्षापछि यहाँका बाटो क्षतविक्षत भएर गाडीसमेत आवागमन हुन सकेका छैनन् ।