काठमाडौँ । सर्वोच्च अदालतले पहिलो डोज खोप लगाएका ज्येष्ठ नागरिकलाई तत्काल दोस्रो डोज खोप दिन अन्तरिम आदेश दिएको छ ।न्यायाधीश ईश्वर खतिवडाको इजलासले गत फागुनमा कोभिशिल्डको पहिलो डोज खोप लगाएका ६५ वर्ष नाघेका १३ लाख ज्येष्ठ नागरिकलाई यथाशीघ्र दोस्रो डोज खोप दिन अन्तरिम आदेश दिएको हो ।

विश्व स्वास्थ्य संगठनका अनुसार कोभिशिल्ड खोपको पहिलो डोज लगाएको ८ देखि १२ हप्तासम्म खोस्रो डोज लगाउन सकिन्छ । तर, नेपालका ६५ वर्षमाथिका साढे १३ लाख ज्येष्ठ नागरिकले पहिलो डोज खोप लगाएको १२ हप्ता नाघिसक्दा पनि पाएका छैनन् । न्यायाधीश खतिवडाको इजलासले पहिलो डोज लगाएका ज्येष्ठ नागरिकलाई दोस्रो डोज खोप दिन ढिला भइरहेको भन्दै यथाशीघ्र खोप व्यवस्था गर्न सरकारलाई अन्तरिम आदेश दिएको छ ।

ज्येष्ठ नागरिकलाई खोप माग गर्दै अर्जुनराज गिरी लगाएतले सर्वोच्च अदालतमा रिट दर्ता गरेका थिए । मंगलबार सर्वोच्चले उक्त रिटमा सुनवाइ गर्दै सरकारका नाममा कारण देखाउ आदेश र तत्काल खोप उपलब्ध गराउन अन्तरिम आदेश दिएको हो । भारतीय कम्पनी सेरम इन्ष्टिच्युटले उत्पादन गरेको कोभिशिल्ड खोप नेपालले थप मात्रा ल्याउन नसक्दा पहिलो डोज खोप लगाएका ज्येष्ठ नागरिकले दोस्रो डोज खोप पाउन सकेका छैनन् ।