काठमाडौँ । नेपाल राष्ट्र बैंकले ठूला ऋणीमाथि अनुसन्धान प्रक्रियाअघि बढाएको छ । बैंकले सबै बैंकहरूलाई ५० लाख रुपैयाँभन्दा बढी ऋण लिने ग्राहकको विवरण दैनिक रुपमा रिर्पोटिङ गर्न निर्देशन दिएको छ ।

पछिल्लो समय निषेधाज्ञाको समयमा उद्योग व्यवसाय सञ्चलनमा नआउँदा कर्जा विस्तार उच्च रुपमा भएपछि केकस्ता क्षेत्रमा कर्जा प्रवाह भइरहेको छ । सो विषयमा छानविन गर्न राष्ट्र बैंकले बैंक तथा वित्तीय संस्थासँग ५० लाख रुपैयाँभन्दा बढी कर्जा लिने ग्राहकको विवरण पठाउन निर्देशन दिएको हो ।

पछिल्लो समय केकस्तो क्षेत्रमा कर्जा विस्तार भइरहेको छ ? त्यसको अनुसन्धान गर्न बढी कर्जा लिने ग्राहकको विवरण पठाउन निर्देशन दिइएको नेपाल राष्ट्र बैंकको सुपरिवेक्षण विभागले जनाएको छ ।

राष्ट्र बैंकको निर्देशन बमोजिम यसअघिका साथै आगामी दिनमा बढी कर्जा लिने ग्राहकको विवरण दैनिक बुझाउनु पर्ने छ । पछिल्लो समय राष्ट्र बैंकको नीतिविपरीत अन्य क्षेत्रमा बढी कर्जा विस्तार भइरहेको गुनासो बढेपछि सोसम्बन्धमा छानविन गर्न बढी कर्जा लिने ग्राहकको विवरण मगाएको सम्बद्ध सरोकारवालाहरु बताउँछन् ।

केही समययता ठूला ऋणीहरुले उद्योग व्यवसायको नाममा कर्जा लिने तर त्यस्ता कर्जा सेयर र घरजग्गामा खरिदमा प्रयोग भइरहेको गुनासो बढेको थियो ।

राष्ट्र बैंकले आगामी आर्थिक वर्ष २०७८÷७९ को मौद्रिक नीति निर्माणका लागि छलफल अघि बढाएको छ भने सोही अनुरुप सुझावहरू समेत मागेको छ ।