काठमाडौं । संसद विघटनविरुद्ध विपक्षी गठबन्धनका पाँच विद्यार्थी संगठन आज संयुक्त सडकमा उत्रिएको छ । गठबन्धनमा आवद्ध दलका भातृ संगठनहरु नेविसंघ, अखिल क्रान्तिकारी, अनेरास्ववियु, समाजवादी विद्यार्थी युनियन र अखिल छैटौंले ले बिहीबार काठमाडौंमा प्रदर्शन गरेका हुन् ।

प्रदर्शनीमार्गमा गरेको प्रदर्शनमा सहभागीहरुले ‘ए प्रतिगमनका बा अब त अति भो, राष्ट्रलाई क्षति भो,’ कोभिड १९ खोप तत्काल व्यवस्था गर, असंवैधानिक कदम खारेज गर, विधिको शासन कायम गर, लगायतका प्लेकार्ड बोकेर प्रदर्शन गरेका छन् ।

अलोकतान्त्रिक, असंवैधानिक र जनविरोधी हर्कत जारी राखेकाले भौतिक दुरी कायम गरी विरोध प्रदर्शन गर्न लागिएको अखिल क्रान्तिकारीका उपाध्यक्ष सुरेन्द्र बस्नेतले जानकारी दिए ।

गत ७ जेठको मध्यरातमा राष्ट्रपतिले संसद् विघटन गरी चुनावको मिति घोषणा गरेपछि विपक्षी गठबन्धन त्यसविरुद्ध रिट निवेदन लिएर अदालत गएको थियो ।

गठबन्धनले प्रतिनिधिसभाका एक सय ४६ जना सांसदलाई सशरीर अदालतमा उपस्थित गराएर संविधानको धारा ७६ (५) बमोजिम कांग्रेस सभापति देउवालाई प्रधानमन्त्री नियुक्त गर्न माग गरेको थियो । अहिले सर्वोच्चको संवैधानिक इजलासमा उक्त रिटमाथि अन्तिम सुनुवाइ चलिरहेको छ ।