काठमाडौं । प्रतिनिधिसभा विघटनविरुद्ध परेको रिटमा सर्वोच्च अदालको संवैधानिक इजलासमा सुनुवाई सुरु भएको छ । सोमबार निवेदक पक्षका कानुन व्यवसायीको जवाफी बहस सुरु भएको हो ।

रिट निवेदकको तर्फबाट वरिष्ठ अधिवक्ता हरिहर दाहालले जवाफ दिन थालेका छन् । जवाफी बहसका लागि संवैधानिक इजलासले छुट्याएको समय मध्ये २ घण्टा दुई मिनेट बाँकी छ । उक्त समयभित्र निवेदक तर्फबाट बरिष्ठ अधिवक्ताहरू हरिहर दाहाल, बद्री बहादुर कार्की, कृष्ण प्रसाद भण्डारी र शम्भु थापाले जवाफ दिनेछन् ।

प्रतिनिधिसभा विघटन मुद्दाको सुनुवाई गर्ने प्रधान न्यायाधीश चोलेन्द्र शम्शेर जबरा, न्यायाधीश दीपक कुमार कार्की, मीरा खड्का, ईश्वरप्रसाद खतिवडा र डा. आनन्दमोहन भट्टराईको इजलास गठन भएको छ । निवेदकका तर्फबाट जवाफी बहस सकिएपछि एमिकस क्युरीको तर्फबाट बहस हुने छ ।

स्वतन्त्र राय दिनका लागि सर्वोच्च अदालत बार र नेपाल बारबाट दुई–दुईजना एमिकस क्युरी छनोट भएका छन् । सर्वोच्च अदालत बार एसोसिएसनबाट बरिष्ठ अधिवक्ता कोमल प्रकाश घिमिरे र प्रकाश बहादुर केसी छन् भने नेपाल बारबाट बरिष्ठ अधिवक्ता राघवलाल वैद्य र उषा मल्ल पाठकले एमिकस क्युरीमा प्रतिनिधित्व गरेका छन् ।