काठमाडौं । सच्चारकर्मी रूपा सुनारले शिक्षा मन्त्री कृष्णगोपाल श्रेष्ठविरूद्धको रिट मुद्दाको सुनुवाइ गर्न इजलास तोकिएको छ । रूपाको रिटमाथि सुनुवाई गर्न सर्वोच्च अदालतका न्यायाधीश नहकुल सुवेदीको इजलास तोकिएको छ । आइतबार उनले शिक्षा मन्त्रीविरूद्ध सर्वोच्च अदालतमा रिट दायर गरेकी थिइन् ।

रूपाले शिक्षा मन्त्री श्रेष्ठ, सरकारी वकिल कार्यालय काठमाडौं, महानगरीय प्रहरी वृत्त सिंहदरबार र सरस्वती प्रधानलाई विपक्षी बनाएर रिट निवेदन दर्ता गरेकी थिइन् । उनले रिटमा जातीय भेदभाव तथा छुवाछुत कसुरको कसुरदारलाई कानुनअनुसार कारबाहीको माग गरेकी छिन् ।

यस्तै, संविधान र कानुनले बर्जित जातीय भेदभाव तथा छुवाछुतजस्तो मुद्दाको अपराध अनुसन्धानलाई मन्त्री श्रेष्ठले प्रभावित पारेको दाबी गरिएको छ ।

रूपाले पदीय ओहदा र सरकारी पद तथा स्रोत समेतको दुरूपयोग गरी प्रहरी कार्यालयमै पुगेर अनुसन्धान प्रभावित पारेको भन्दै मन्त्री श्रेष्ठलाई पदबाट तत्काल हटाउन र मन्त्री श्रेष्ठविरूद्ध उजुरी दिँदा प्रहरीले लिन नमानेको भन्दै उजुरी लिएर अनुसन्धान अघि बढाउने आदेश पनि माग गरेकी छिन् ।