काठमाडौँ । प्रतिनिधिसभा विघटनविरुद्ध परेको रिटमाथि एमिकस क्युरी उषा मल्ल पाठकले संसद विघटन संविधानअनुसार भएको दाबी गरेका छन् । उनले आगामी दिनमा उत्तम विकल्प निर्वाचन मात्रै भएको बताएकी छन् ।

नेपाल बार एसोसिएसनका तर्फबाट एमिकस क्युरी चयन भएकी पाठकले धारा ७६ (५)मा विश्वासको मतका आधार हेरेर दाबी अस्वीकृत गर्ने अधिकार राष्ट्रपतिको नै भएको बताएकी थिइन् ।

त्यस्तै, पाठकले धारा ७६ (५) अनुसारको सरकार बन्न नसकेपछि धारा ७६ (३) अनुसारको प्रधानमन्त्रीले गरेको संसद विघटन संविधानसम्मत भएको दाबी गरेकी हुन् । ‘मुलुकलाई निकास दिन एकमात्र विकल्प चुनाव हो, त्यसैले रिट निवेदन खारेज हुनुपर्छ र चुनावमा जानुपर्छ,’ उनले थपिन् ।

राष्ट्रपतिले स्वविवेक प्रयोग गरी प्रधानमन्त्री चयन गरेको वरिष्ठ अधिवक्ता पाठकले दाबी गरिन् । उनले स्वास्थ्य सुरक्षालाई ध्यान दिँदै निर्वाचन गर्नु पर्नेमा जोड दिन माग गरेकी छन् ।

उनले प्रधानमन्त्रीले संसदबाट विश्वासको मत लिनु पर्ने व्यवस्था संविधानमा नभएको बताइन् ।