भारत । बलिउड अभिनेत्री आलिया भट्टको निर्माणमा बन्न लागेको नयाँ फिल्म ‘डार्लिङ्स’को छायांकन सुरु भएको छ । आलियाले आफ्नो भ्यानेटी भ्यानमा छायांकनको तयारी गरिरहेको फोटो राखेर ‘डार्लिङ्स’को काम सुरु भएको खुसी ट्विटरमा सेयर गरेको हिन्दुस्तान टाइम्सले जनाएको छ ।

ट्विटमा उनले पहिलो पटक निर्माता र अभिनेत्री भएर काम गर्न हल्का डर लागेको बताएकी छिन् । आलियाको यस ट्विटमा रिपोस्ट गर्दै अभिनेता शाहरुख खानले आफ्नो लागि काम मागेका छन् । उनले आलियासँग काम गर्ने इच्छा भएकाले अर्को फिल्ममा आफूलाई पनि काम दिन अनुरोध गरेका छन् ।

‘योपछि कृपया मलाई तिम्रो अर्को होम प्रोडक्सनका लागि साइन अप गरिदेऊ,’ शाहरुखले ट्विटरमा लेखेका छन्, ‘म सुटिङका लागि समयमा नै आउनेछु र व्यवसायिक हुनेछु ।’

नयाँ फिल्म ‘डार्लिङ्स’ आलियाको प्रोडक्सन हाउस इटरनल सनसाइन र शाहरुख खानको रेड चिल्ली इन्टरटेनमेन्टको सह–निर्माणमा बन्न लागेको हो । जसमित के रिनद्वारा निर्देशित यो फिल्ममा आलिया भट्ट, शेफाली शाह, विजय शर्मा र रोशन मैथ्यूको मुख्य भूमिका छ ।

पछिल्लो समय शाहरुख कता हराए भन्ने समाचार भारतिय सञ्चार माध्यममा आइरहेको छ । शाहरुखले रमाइलो शैलीको ट्विट देखेर आलियाले हाँस्दै शाहरुखलाई आफ्नो काममा लिने सम्झौता भएको जानकारी दिएकी छन् ।

‘डार्लिङ्स’ आमा र छोरी जोडीबीचको पृथक कथामा आधारित चलचित्र हो ।

मुम्बई सहरको तल्लो मध्यम वर्गीय पृष्ठभूमिमा बुनिएको फिल्मको कथामा आमा र छोरी असाधारण परिस्थितिमा पनि साहस र माया खोजिरहेका हुन्छन्। व्यवसायिक फिल्मबाट आफ्नो अभिनय करियर सुरु गरेकी आलियाले गम्भीर खालका थुप्रै राम्रा फिल्ममा काम गरेर मन जितिरहेकी छन् ।

आलियाले यसअघि नै शाहरुख खानसँग काम गरिसकेकी छन् । सन् २०१६ मा रिलिज भएको फिल्म ‘डियर जिन्दगी’मा आलिया र शाहरुखको मूख्य अभिनय थियो । यी दुई कलाकार ‘ए दिल हे मुश्किल’ र ‘जिरो’ फिल्ममा पनि एउटै स्क्रिनमा देखिएका थिए ।