काठमाडौं । नेपाली कांग्रेस नेता एवं राष्ट्रिय सभा सदस्य रमेशजंग रायमाझीको पहलमा हेलम्बुका बाढी पीडितका लागि ५ लाख बराबरको सहयोग हस्तान्तरण गरिएको छ । आज हेलम्बुको गाउँपालिका पुगेर नेता रायमाझीले गाउँपालिका अध्यक्ष निमाग्याल्जेन शेर्पालाई सहयोग हस्तान्तरण गरेका हुन् ।

सुन्दरहरैचा नगरपालिका, विराटचोक मोरङको सहयोगमा ३८ वटा टेन्ट उपलब्ध गराइएको छ । मेलम्चीमा आएको बाढीले घरवारविहीन भएकाहरूका लागि सो टेन्ट आवासको व्यवस्था सहज होस् भनेर हस्तान्तरण गरिएको नेता रायमाझीले जानकारी दिए । उनले मेलम्ची बाढीपीडितका लागि आवश्यक पहलकदमी सरकारले नलिएको भन्दै सो विषय राष्ट्रिय सभा बैठकमा उठाउने र थप सहयोगका लागि पहल गर्ने पनि बताए । हेलम्बुको दुखमा साथ दिएको भन्दै सिन्धुपाल्चोक कांग्रेसका युवा नेता प्रेमध्वज लामाले सुन्दरहरैचा नगरपालिका र नेता रायमाझी प्रति आभार व्यक्त गरे ।