काठमाडौं । वैदेशिक रोजगारको क्षेत्रलाई चलायमान बनाउनका लागि धरौटी राखिएको रकमबाट सापटी दिनुपर्ने माग व्यवसायीहरुले गरेका छन् ।

कोरोनाको महामारीका कारण थलिएको व्यवसायलाई चलायमान बनाउन राहत स्वरुप धरौटी रकमबाट तत्कालका लागि सापटी दिनु पर्ने व्यवसायीले बताएका हुन् ।

धरौटी रकमबाट निश्चित समय तोकेर व्यवसायीलाई सापटीका रूपमा चलाउन दिँदा व्यवसायीलाई केही मात्रामा भए पनि राहत हुने नेपाल वैदेशिक रोजगार व्यावसायी संघका सचिव मेघनाथ भुर्तेल बताएका छन् ।

धरौटी राखिएको पैसा समय तोकेर व्यावसायीलाई सापटी दिँदा कर्मचारीको तलब तथा कार्यालय व्यवस्थापनमा सहज हुने उनले बताए । आपूmहरुले यस विषयमा बारम्बार आवाज उठाएको भए पनि सरकारले ध्यान नदिएको उनले बताएका छन् ।

धरौटी रकम फिर्ता गर्ने विषयमा सम्बन्धित निकायले हुन्न पनि नभन्ने तर व्यवसायीलाई राहत दिन पनि तयार नहुने अवस्था रहेको उनको भनाइ थियो ।

व्यवसायीले नै राखेको रकम व्यवसायीलाई नै चलाउन दिँदा राहतको महसुस गर्ने र केही समयपछि फिर्ता हुने भएकाले यसतर्फ सरकारले ध्यान दिनु पर्ने व्यवसायीको भनाइ छ ।

महामारी सुरु भएपछि आउने श्रम रोजगार तथा सामाजिक सुरक्षा मन्त्री कृष्ण गोपाल श्रेष्ठ र सुर्यप्रसाद गौतम सचिवसँग व्यवसायीले यो माग राखेका हुन् ।

नेपाल सरकारले इराक घटना भएको समयमा म्यानपावर व्यवसायीलाई राहत स्वरुप राखेको धरौटी रकम २ वर्षका लागि फिर्ता गरेको थियो । सोही अनुसार अहिले पनि व्यवसायीले राखेको धरौटी रकमबाट कम्तीमा पनि १ वर्ष प्रयोग गर्न पाउनु पर्ने माग गर्दै आएका छन् ।

व्यावसायीले राखेको धरौटी रकमबाट केही प्रतिशत ब्याज लिएर भए पनि सापटी दिनु पर्ने नेपाल लोकतान्त्रिक वैदेशिक रोजगार एसोसिएसनले जनाएको छ ।

वैदेशिक रोजगार व्यावसायीले धरौटीबापत कम्तीमा ५० लाख रुपैयाँ जम्मा गरेका छन् । सो ५० लाख केही समयका लागि सापटी दिँदा व्यावसायीले आफ्नो आन्तरिक व्यवस्थापन मिलाउन सहज हुने व्यवसायीको भनाइ छ ।

महामारीको असहज स्थितिमा धरौटी रकम चलाउँन पाउँदा व्यवसायीलाई ठूलो राहत हुने प्रगतिशित वैदेशिक रोजगार व्यवसायी मञ्च नेपालका कार्यबाहक अध्यक्ष राजेन्द्र भण्डारीले बताएका छन् ।

धरौटी रकम सापटी पाएको खण्डमा व्यावसायीलाई सञ्जिवनी बुटीकै काम गर्ने उनको भनाइ छ । यस्तो विपत्को समयमा पनि यसतर्फ सरकारले खासै चासो नदिएको आरोप थियो ।