काठमाडौं । विवाद समाधान नजिक पुगेको भनिएको नेकपा (एमाले) कार्यदलको बैठक आज पनि बस्दै छ । सिंहदरबारस्थित अर्थ मन्त्रालयमा बिहान ८ बजे बैठक बस्ने कार्यदल सदस्य सुवास नेम्वाङले जानकारी दिए ।

आजको बैठकले सहमतिलाई अन्तिम दिने र सार्वजनिक गर्ने कार्यदल सदस्यहरुले दावी गरेका छन् । शनिबार बसेको कार्यदलको बैठकपछि नेताहरुले आइतबार सहमति भएर सार्वजनिक गरिने बताएका थिए । ओली पक्षका कार्यदल सदस्य नेम्वाङले भने,“आज बिहान ८ बजे बसेर सुखद समाचार पाउनुहुनेछ ।”
र आजसम्म सबै विषयमा सहमति जुट्ने कार्यदलमा रहेका नेपाल पक्षका नेता गोकर्ण विष्टले जानकारी दिए । पार्टी एकतामा समस्या के थिए ? कसरी समाधान गर्ने ? भन्ने छलफल भएको भन्दै कार्यदलका सदस्य विष्टले भने, ‘आज सुखद समाचार सुन्न पाउनुहुन्छ ।’
सर्वोच्च अदालतले असार २८ मा प्रतिनिधिसभा विघटनमा निर्णय दिने तयारी गरेको छ । त्यो अगाडि नै एमालेभित्रको विवाद मिलाउन नेताहरुले पहल गरेका छन् ।