काठमाडौँ । नवनियुक्त प्रधानमन्त्री शेरबहादुर देउवालाई नेकपा (एमाले)का वरिष्ठ नेता माधवकुमार नेपालले भेट गरी शुभकामना दिएका छन् । प्रधानमन्त्रीको शपथ ग्रहण गरेलगत्तै शुभकामना आदानप्रदान गर्ने क्रममा नेता नेपाल मञ्चमा पुगेर देउवालाई शुभकामना दिएका हुन् ।

नेता नेपालपछि नेकपा (माओवादी केन्द्र)का अध्यक्ष पुष्पकमल दाहाल प्रचण्डले शुभकामना दिएका थिए । देउवाले आज साँझ सपथ ग्रहण गर्ने भनिए पनि राष्टपति कार्यालयको त्रुटीका कारण करिब ३ घण्टा ढिलो भएको हो ।

आजै एमालेका अध्यक्ष केपी शर्मा ओलीले देशबासीको नाममा सम्बोधन गर्दै प्रधानमन्त्रीको पदबाट राजीनामा दिएका थिए । देउवालाई प्रधानमन्त्री बनाउन माग गर्दै सर्वोच्चमा परेको रिटमा हस्ताक्षरसहित सहभागी भएका नेता नेपालले केपी शर्मा ओलीको विरोध गर्दै विपक्षी गठबन्धनसँग सहकार्य गरेका थिए ।

सोमबार सर्वोच्च अदालतले विघटित प्रतिनिधिसभा पुनस्र्थापित गर्दै विपक्षी गठबन्धनको पक्षबाट प्रधानमन्त्री पदमा दाबी गरेका देउवालाई प्रधानमन्त्रीमा नियुक्त गर्न राष्ट्रपतिको कार्यालयलाई परमादेश दिएको थियो । सर्वोच्च फैसलासँगै बसेको विपक्षी गठबन्धनको बैठकमा नेता नेपालले आगामी दिनमा गठबन्धनका नहुने भन्दै बाहिरिएका थिए ।

देउवाकाे शपथ समाराेहमा पूर्वप्रधानमन्त्रीहरू र दलका नेताहरू उपस्थित भए पनि केपी ओली र उनी पक्षीय नेताहरू उपस्थित भएनन् ।