काठमाडौँ । नेकपा एमालेका उपध्याक्ष भीम रावलले आफूप्रति मन गढन्ते समाचार लेखेर भ्रम फैलाउने काम भएको बताएका छन् । भारतीय गुप्तचर संस्था ‘रअ’का प्रतितिधिसँग साँझ ८ बजेदेखि ९ बजेसम्म होटल मेरियटमा भेटेको भन्ने कथित समाचार बनाएर अनलाइन खबरलगायत समाचार संस्थाहरूले प्रकाशन गरेको भन्दै उनले आपत्ति जनाएका हुन् ।

‘त्यो दिन साँझ ६ बजे म र रघुजी पन्त माधव कुमार नेपालजीको निवासमा थियौँ, हामीले कुरा गरिहेको समयमा विष्णुप्रसाद पौडेलजीको मलाई फोन आयो । उहाँको फोन आएको कुरा उहाँहरू दुवै जनालाई जानकारी गराएँ । विष्णुजीले बालुवाटारमा प्रधानमन्त्रीले कुरा गर्न खोज्नुभएको छ भन्नु भएपछि मैले माधव नेपालजी र रघुजीले सुन्नेगरी फोन खुला राखेँ,’ नेता रावलले भने, ‘कोटेश्वरबाट निस्कदा करिब सवा ६ बजिसकेको थियो । त्यहाँबाट म आफ्नो घरमा टोखा गएँ । घर पुग्दा ७ बजिसकेको थियो । घरमा खाना ढिलो हुने भएकाले मैले विष्णुजीलाई फोन गरेर म ८ बजेतिर मात्र पुग्ने खबर गरिदिन आग्रह गरेँ । खाना खाएर तयार हुँदा करिब ८ बजिसकेको थियो । खाना खाएर म बालुवाटार पुग्दा करिब ८ बजेर १५ मिनेट भएको थियो । यस्तो तथ्लाई बंग्याएर म माधव नेपालजीको निवासबाट ८ बजे निस्केको र आधा घण्टा गायव भएर पौने ९ बजे बालुवाटार पुगेको भन्ने मनडढन्ते समाचार लेखेर प्रपञ्च गरिएको छ ।’

यस्तै, केपी शर्मा ओलीले आफूलाई कार्यवाहक अध्यक्ष बनाउने प्रस्तावमा सत्य नभएको बताएका छन् ।