काठमाडौं । कोरोना संक्रमणको ग्राफ उकालो लाग्न थालेपछि कोभिड–१९ संकट व्यवस्थापन केन्द्र (सीसीएमसी)को बैठक बस्दै छ ।

आज अपरान्ह ४ बजे सिंहदरबारमा बस्ने सीसीएमसीको बैठकमा कोरोना नियनत्रण लगायत विषयमा छलफल हुने प्रधानमन्त्रीको सचिवालयले जनाकारी दिएको छ ।

प्रधानमन्त्रीको सचिवालयका अनुसार कोरोना संक्रमण बढ्न थालेपछि त्यसको रोकथामको उपायका सन्दर्भमा छलफल हुने छ । विहीबार मात्र थप ३ हजार ३६५ जनामा कोरोना संक्रमण पुष्टि भएको थियो ।

स्वास्थ्य तथा जनसंख्या मन्त्रालयका अनुसार कोरोना संक्रमित संख्या बढ्दै गएपछि अस्पतालका आईसीयू र भेन्टिलेटर फेरि भरिन थालेका छन् । प्रधानमन्त्री शेरबहादुर देउवालाई कोरोना संक्रमणको पछिल्लो अवस्थाबारे गृहमन्त्री बालकृष्ण खाणले पनि जानकारी गराएका थिए ।

सरकारले यसअघि सातै प्रदेशलाई एक÷एक हजार अक्सिजन सिलिन्डर भरेर राख्न भनेको थियो ।