काठमाडौं । नेकपा एमालेले पार्टी वरिष्ठ नेता माधव कुमार नेपाल पक्षले बोलाएको केन्द्रीय कमिटीको बैठकप्रति आपत्ति जनाएको छ । केन्दीय पार्टी कार्यालय सचिव शेरबहादुर तामाङले जारी गरेको विज्ञप्तिमा बिहीबार बस्न लागेको नेपाल पक्षको बैठकले ध्यानाकर्षण भएको बताइएको छ ।

विज्ञप्तिमा भनिएको छ, ‘नेपाल कम्यनिष्ट पार्टी (एमाले) केन्द्रीय कमिटीको नामबाट श्रावण १ गते बैठक आयोजना गरिएको भन्ने सुनिन आएकोले एमाले केन्द्रीय कार्यालयको गम्भीर ध्यानाकर्षण भएको छ । श्रावण २१ गते एमाले केन्द्रीय कमिटीको कुनै बैठक आयोजना नगरिएको सबैमा जानकारी गराउँदछु । पटक पटक एमालेको नामबाट अनधिकृत गतिविधि गर्ने र सो गतिविधिमा सरिक हुने विषय संविधान, प्रचलित कानुन र पार्टी विधान विपरित हुने भएकाले सो गतिविधिमा नलाग्न पार्टी कार्याकर्ताहरुमा अपिल गर्दछु ।’

एमाले नेपाल पक्षले बुधबारको लागि बोलाएको बैठक स्थगित गरेर बिहीबारको लागि बोलाएको छ । तर एमालेले त्यसप्रति आपति जनाएको छ । पार्टी विवाद मिलेको र अध्यक्ष केपी शर्मा ओली र वरिष्ठ नेता नेपालबीच भेटवार्ता गर्ने तय भएको भनिएको बेला एक पक्षले केन्द्रीय कमिटीको बैठक बोलाएको छ भने अर्को पक्षले प्रतिवाद गरेको छ ।