काठमाडौँ । नेपाली कांग्रेसका सभापति शेरबहादुर देउवा प्रधानमन्त्री नियुक्त भएको एक महिना पुग्न लाग्दा २० वटा मन्त्रालय खाली छ । मन्त्रालयमा मन्त्री मात्र होइन उच्च स्तरको कर्मचारी अर्थात सचिवहरूको पदसमेत खाली बन्न पुगेको छ ।

गठबन्धन दलहरूको साथमा प्रधानमन्त्री बनेका देउवालाई मन्त्री मण्डल विस्तार गर्न कठिन भएजस्तै मन्त्रालयमा सचिवहरू ल्याउनसमेत कठिन भएको हो । मन्त्रालयमा भागबण्डा मिलाउन नसकेका प्रधानमन्त्रीले विभिन्न महत्वपूर्ण मन्त्रालयमा मन्त्रीसँगै सचिव नियुक्त गर्न नसकेका हुन् ।

मन्त्रालयमा परेको भाग बण्डाका आधारमा सचिवहरू सरुवा गर्ने देउवाको तयारी छ । रक्षा मन्त्रालय, कृषि तथा पशुपन्छी विकास मन्त्रालय, स्वास्थ्य तथा जनसंख्या मन्त्रालय, सञ्चार तथा सूचना प्रविधि मन्त्रालय र वन तथा वातावरण मन्त्रालयमा सचिवको पदसमेत खाली बन्न पुगेको हो ।

मन्त्रालयमा मन्त्रीसँगै सचिवहरू नहुँदा काम कारवाहीमा समस्या उत्पन्न सुरु भएको छ । लामो समयदेखि मन्त्री र सचिव नहुँदा मन्त्रालयका दैनिक कामसमेत रोकिएको एक कर्मचारीले जानकारी दिए ।

स्रोतका अनुसार पाँचजना सचिवलाई जिम्मेवारीविहीन बनाएर प्रधानमन्त्री तथा मन्त्रिपरिषद्को कार्यालयमा राखिएको छ । बढुवा भएका सचिवलाई समयमै पद स्थापन नगर्दा उनीहरू प्रधानमन्त्री तथा मन्त्रिपरिषद् कार्यालयमा दिन बिताउन बाध्य भएका हुन् ।

प्रधानमन्त्री तथा मन्त्रिपरिषद् कार्यालयको अतिरिक्त समूहमा रहेका सचिवहरूमा कृष्णहरि पुष्कर कर्ण, खगेन्द्रप्रसाद नेपाल, किरण राज शर्मा, रामप्रसाद घिमिरे र हरिप्रसाद मैनाली रहेका छन् । प्रधानमन्त्री कार्यालयमा यसअघि चारजना सचिव रहेकोमा बढुवा भएका पाँचजना थपिएपछि उक्त कार्यालयमा नौजना सचिव छन् ।

तत्कालीन प्रधानमन्त्री केपी शर्मा ओली नेतृत्वको सरकारले ईश्वर पोखरेललाई रक्षा मन्त्रीबाट हटाइएदेखि विभागीय मन्त्री पाउन नसकेको रक्षा मन्त्रालयका सचिव रेश्मीराज पाण्डे अनिवार्य अवकाशसँगै मन्त्रालयको सचिव पद रिक्त छ ।

कृषि तथा पशुपन्छी विकास मन्त्रालयमा दुई जना सचिवको व्यवस्था गरिएकोमा डा. कृष्णप्रसाद आचार्य (पशुपन्छी विकास)तर्फ सचिव छन् । तर, कृषि विकासतर्फ सचिव डा. योगेन्द्र कुमार कार्की अवकाश प्राप्त गरेसँगै उक्त सचिवको पद हुन पुगेको हो ।

सहसचिवको भरमा सञ्चालन भइरहेको सञ्चार मन्त्रालय सचिव हरिप्रसाद बस्यालको अवकाशपछि खाली उक्त पद खाली हुन पुगेको थियो । सरकारले स्वास्थ्य मन्त्रालयमा स्वास्थ्य राज्यमन्त्री नियुक्त गरे पनि विभागीय मन्त्री नियुक्त गर्न सकेको छैन ।

व्यापारीलाई स्वास्थ्य राज्यमन्त्री दिएपछि चौतर्फी आलोचना खेपेका देउवाले महामारीको विषम परिस्थितिमा सचिवसमेत नियुक्त गर्न नसक्दा थप आलोचना खेप्नु परेका छन् । दुई सचिवको दरबन्दी रहेको मन्त्रालयमा प्रशासनतर्फका सचिव लक्ष्मण अर्यालको सरुवा भएपछि उक्त ठाउँ रिक्त भएको हो । मन्त्रालयको स्वास्थ्य सेवातर्फ सचिवमा डा. रोशनपोखरेल नियुक्त भएका छन् ।

वन तथा वातावरण मन्त्रालयमा वनतर्फ एक र वातावरणतर्फ एक गरी दुई सचिवको व्यवस्था गरिएको छ । तर, हाल सचिव डा. प्रेम नारायण कँडेल रहेका छन् भने अर्को सचिव पद रिक्त रहेको छ ।

मन्त्रीसँगै सचिव नहुँदा रक्षा, स्वास्थ्य, वन, शिक्षा र कृषि जस्ता महत्वपूर्ण मन्त्रालयमा प्रशासनिक कार्यहरु अपुरो र अधुरो हुन थालेको छ ।