काठमाडौँ । नेपाली कांग्रेसको १४ औं महाधिवेशन फेरि सर्ने निश्चित भएको छ । २८ साउनमा बोलाइएको केन्द्रीय कार्यसमिति बैठकले औपचारिक रुपमै १४ औं महाधिवेशन मंसिरमा सार्नेछ ।

महाधिवेशन मंसिरमा गर्नेगरी कार्यातालिका बनाउन प्रधानमन्त्रीसमेत रहेका सभापति शेरबहादुर देउवाले पार्टी केन्द्रीय कार्यालय र आफ्नो सचिवालयलाई निर्देशन दिएका छन् । महाधिवेशन सार्ने तयारी गर्नुअघि सभापति देउवाले निर्वाचन आयोग र दलसम्बन्धी कानुनका जानकार र सर्वोच्च अदालतसँगसमेत परामर्श गरेका थिए । प्रमुख निर्वाचन आयुक्तलाई बोलाएर र सर्वोच्च अदालतका प्रतिनिधिसँग भने टेलिफोनमा कुराकानी गरेपछि मंसिरमा महाधिवेशन सार्नेगरी तयारी गर्न सचिवालयलाई निर्देशन दिएका हुन् ।

महाधिवेशनको कार्यतालिका कसरी गराउने भन्ने जिम्मेवारी महामन्त्री पूर्णबहादुर खड्कालाई दिएको देउवानिकट स्रोतले जानकारी दियो । अनौपचारिक कुराकानीका क्रममा महामन्त्री खड्काले महाधिवेशनबारे केही गृहकार्य भइरहेको स्वीकारे पनि सार्ने र नयाँ कार्यातालिका बनाउने विषयमा औपचारिक निर्णय आएपछि थाहा हुने भनेर टारे ।

देउवाले महाधिवेशन मंसिरसम्म पु¥याउनेबारे नेता रामचन्द्र पौडेल र नेता कृष्णप्रसाद सिटौलासँग छुट्टाछुट्टै र संयुक्त छलफल गरेका थिए । क्रियाशील सदस्यताको विवाद समाधानका विषयमा छएका उनीहरुसँगका छलफलमा यो विषयमा पनि छलफल भएको हो । उनीहरुले ग्रीन सिंनल दिएपछि उनी महाधिवेशन सार्न सचिवालयलाई निर्देशन दिएर त्यसलाई पारित गर्न २८ साउनमा केन्द्रीय कार्यसमितिको बैठक बोलाएका हुन् ।

कांग्रेस विधानमा प्रत्येक चार-चार वर्षमा महाधिवेशन गर्नुपर्छ । १३ महाधिवेशनबाट निर्वाचित देउवा नेतृत्वको कार्यसमितिकोे अवधि २०७६ फागुन २३ मा सकिएको हो । विधानमा भएको आपतकालिन अवस्था भन्ने क्लजलाई टेकेर केन्द्रीय समितिले आफ्नो कार्यकाल २०७७ फागनु २३ सम्म सार्‍यो । त्यसमा पनि कोभिड–१९ महामारीले गर्न नसक्ने भएपछि संविधानमा भएको व्यवस्था उपयोग गरी भदौ २३ गतेसम्मलाई सारियो ।

केहीले त २३ भदौमा वडा अधिवेशन गरेर केन्द्रीय महाधिवेशन मंसिरमा सार्न सुझाएका थिए । अझै पनि भदौ मै सुरु गरेर मंसिरमा केन्द्रीय अधिवेशन पुर्‍याउने विषयमा छलफल जारी छ । तर, क्रियाशील विवाद चार जिल्ला र १०० वडामा नमिलेकाले सुरु गर्न सक्ने नसक्ने भन्नेमा अन्यौल नै छ ।

निर्धारित मितिमा महाधिवेशन हुने सम्भावना टर्यो । अब मंसिरमा सार्ने तयारीमा छौं । धेरै साथीहरुले निर्वाचनपछि महाधिवेशन सार्न सुझाव दिनु भएको थियो, सभापतिले मान्नुभएन ।

– एनपी साउद, केन्द्रीय सदस्य, नेपाली कांग्रेस

महाधिवेशन मंसिरसम्म सार्ने र तयसका लागि २८ साउनको केन्द्रीय समितिमा कार्यतालिका पेस गर्ने तयारीमा सभापति र पार्टीको केन्द्रीय कार्यालय लागेको देउवाका विश्वासपात्र केन्द्रीय सदस्य एनपी साउदले जानकारी दिए । ‘निर्धारित मितिमा महाधिवेशन हुने सम्भावना टर्यो । अब मंसिरमा सार्ने तयारीमा हामी छौं । त्यसका लागि सभापतिज्यूको सचिवालय र पार्टी केन्द्रीय कार्यालयले तयारी गरेको छ । २८ गतेको केन्द्रीय समितिमा पेस हुन्छ,’ साउदले भने ।

धेरै नेताहरुले तीन तह (संघ, प्रदेश र स्थानीय तह)को निर्वाचन सम्पन्न भएपछि महाधिवेशन गर्नेगरी वातावरण मिलाउन भने पनि सभापति देउवाले मंसिर भन्दा पर सार्न नसकिने भन्दै त्यसको तयारी गर्न निर्देशन दिएका हुन् । ‘धेरै साथीहरुले निर्वाचनपछि महाधिवेशन सार्न सुझाव दिनु भएको थियो, सभापतिले मान्नुभएन,’ साउदले भने ।

अहिले कांग्रेसले १४ औं महाधिवेशनको मिति आगामी भदौ १६ देखि १९ गतेसम्म काठमाडौंमा कार्यतालिकासहित तोकेको थियो । तर, त्यसमा तोकिएको वडा र गाउँ-नगर अधिवेशनको मिति घर्किसकेको छ ।