काठमाडौं । नेकपा एमालेका वरिष्ठ नेता माधव नेपालले पार्टी एकताको सम्भावना सकिएको बताएका छन् । पार्टी अध्यक्ष केपी शर्मा ओली पक्षलाई विधान महाधिवेशनको तयारी गर्ने गरी बोलाइएको केन्द्रीय कमिटी बैठक रोक्न, विगतका कमजोरी स्वीकार गर्न र एकताको गम्भीर पहलमा लाग्न गरेको आग्रह अटेर गरी विधान अधिवेशनको तयारी गर्ने, विधान संशोधन प्रस्तावअगाडि बढाउने र फेरि पनि एकलौटी पार्टी कब्जा गर्ने गरी शक्तिशाली अध्यक्ष बनाउने प्रस्तावअगाडि सारेको भन्दै बरिष्ठ नेता नेपालले अब एकताको सम्भावना कमजोर बनेको निष्कर्ष निकट नेताहरुसँग सुनाएका हुन् ।

सोमबार एमालेको स्थायी कमिटी र केन्द्रीय कमिटी बैठक राखेर अध्यक्ष ओलीले अध्यक्षलाई थप शक्तिशाली बनाउने गरी विधान संशोधनको प्रस्तावअगाडि सारेका थिए । त्यसप्रति नेपालले असन्तुष्टि जनाउँदै ओली अब कुन शैलीमा अगाडि जान लागेको भन्ने साथीहरुले बुझ्नु भयो होला नि भन्दै एकताको च्याप्टर क्लोज भएको बताएका हुन् ।

नेताहरु युवराज ज्ञवाली, विरोध खतिवडा, जगन्नाथ खतिवडालगायतका नेताहरुसँग अनौपचारिक सम्वादका क्रममा नेपालले ओलीको कार्य शैली पार्टी मिलाउने भन्दा विवाद बल्झाउने, तन्काउने र एकलौटी शैलीमा पार्टी चलाउने गरी ढंगले अगाडि बढेको भन्दै अब यसरी नहुने बताएको नेपालसँग विकसित राजनीतिका बारेमा सम्वाद गरेका एक नेताले मेरोन्यूजसँग भने ।

‘ओलीले सोमबार गरेको एकलौटी निर्णय देखिहाल्नु भयो । हाम्रोभित्रका पनि कतिपय साथीहरु एकता-एकता भन्नु हुन्थ्यो, अब त ओलीको सोच र शैली के रहेछ बुझ्नु भयो होला नि, उनी सच्चिदैनन् भनेर मैले त भन्दै आएको हो, देखिहाल्नु भयो, सोमबार उनले के गरे ?’ नेपालको भनाई उदृत गर्दै ती नेताले भने, ‘अब एकताको सम्भावना करिब सकियो, अब एकताको च्याप्टर क्लोज भयो । हामीले पनि आफ्नो गतिविधि अगाडि बढाउनु पर्छ ।’

ओलीले सोमबार अध्यक्ष र केन्द्रीय कमिटी मात्र निर्वाचित हुने, अध्यक्षलाई शक्तिशाली बनाउने र पदाधिकारीसमेत मनोनित गर्ने गरी विधानमा व्यापक संशोधन गर्ने गरी प्रस्ताव ल्याएका छन् । ओलीले पार्टीमा दुई उपाध्यक्ष, एक महासचिव, दुई उपमहासचिव, सात केन्द्रीय सचिव केन्द्रीय समितिले नै चयन गर्ने गरी प्रस्ताव ल्याएका छन् ।

नवौँ महाधिवशेनबाट निर्वाचित पदाधिकारी नेपाल समूहकाले बढी जितेपछि उनले मनोनित गर्ने गरी व्यवस्था गर्न चाहेका हुन् ।

एमालेमा २०६५ सालदेखि बहुपदीय प्रणाली लागू भएको थियो । २०६५ मा भएको आठौं महाधिवेशनबाट अध्यक्ष, तीन उपाध्यक्ष, एक महासचिव र तीन सचिव निर्वाचित भएका थिए । त्यसपछि नवौँ महाधिवेशनबाट अध्यक्ष, पाँच जना उपाध्यक्ष, एक महासचिव, दुई उपमहासचिव र पाँच सचिव निर्वाचित भएका थिए । निवर्तमान अध्यक्ष स्वत: वरिष्ठ नेता र वरिष्ठ नेता पदाधिकारी हुने विधानमा प्रावधान थियो ।

तर आगामी महाधिवेशनबाट पार्टीमा आफै अध्यक्षमा दोहोरिने र आफैले सहजता हुने गरी पदाधिकारी मनोनित गर्ने गरी अधिकार केन्द्रीत गर्ने सोचका साथ विधानको संशोधित मस्यौदा प्रस्ताव तयार पारेर विधान महाधिवेशनबाट पारित गराउन चाहेका नेपाल पक्षको बुझाई छ ।

नेता नेपालले ओली पक्षले आफ्नो गतिविधि अगाडि बढाउन थालेकाले आफूहरूले पनि काउन्टर गतिविधि तीव्र बनाउनु पर्ने बताएका छन् ।

नेपालको भनाई उदृत गर्दै ती नेताले भने, ‘केपी ओलीले आफ्ना कार्यक्रम धमाधम गरिरहेका छन् । हामीले रोकिनुस् भनेर गरेको आग्रहलाई उनले टेरेनन् । अब हामी तमासा हेरेर उता के गर्छन्, के भन्छन् भनेर कुरेर बस्ने होइन, हामी अगाडि बढ्नु पर्छ । शक्ति जम्मा गर्दै जानुपर्छ देशव्यापी समानान्तर गतिविधि तीव्रतामा लिएर जानु पर्छ ।’

नेपालले अब आफूले साथीहरुसँग छलफल गरेर निर्णायक स्टेप लिएर जाने सोचिरहेको बताएको ती नेताले बताए ।