काठकाडौँ । राष्ट्र संघको शान्ति मिशनमा जान नेपाल प्रहरीले लिने आन्तरिक परीक्षा (प्रि–स्याट) को प्रश्नपत्र चोरीमा संलग्न ३ जना प्रहरीलाई सेवाबाट हटाउन सिफारिस गरेको छ । शान्ति मिसनमा जान प्रहरीले लिने आन्तरिक परीक्षा (प्रि–स्याट)को प्रश्न पत्र चोरीमा संलग्न ३ जनालाई प्रहरीबाट बर्खास्त गर्न छानविन समितिले सिफारिस गरेको हो ।

प्रहरी नायव महानिरीक्षक (डिआइजी) वसन्त लामाको नेतृत्वमा गठन गरिएको छानविन समितिले बुधबार प्रहरी महानिरीक्षक शैलेश थापा क्षेत्रीलाई ५ सय ५० पृष्ठको प्रतिवेदन बुझाउँदै ३ जनालाई प्रहरी सेवाबाट हटाउन सिफारिस गरेको हो । समितिले प्रहरी नायव निरीक्षक जनकबहादुर थापा, हवल्दार कुमार शाह र कार्यालय सहयोगी सुरेश बमलाई जागिरबाट हटाउन सिफारिस गरिएको छ ।

परीक्षा रद्द गर्न सिफारिस

छानविन समितिले युएन शाखाका एसपी अनुपम शमशेर जबरा र डिएसपी रुपेश खड्कासहित ११ जनालाई विभागीय कारबाही गर्न सिफारिस गरेको छ । साथै छानविन समितिले सबैतिर प्रश्नपत्र लिक भएको हुनाले परीक्षा रद्द गर्न सिफारिस गरेको छ ।

साउन १५ र १६ मा प्रहरी प्रधान कार्यालय तथा ७ वटा प्रदेश प्रहरी कार्यालयमा परीक्षा सञ्चालन भएको थियो । प्रश्न पत्र परीक्षा हुनुभन्दा दुई दिनअघि नै ‘लिक’ भएको छानविनबाट पुष्टि भएको हो । शान्ति मिसनको प्रश्न पत्र १ सय १९ जना परीक्षार्थीहरूको हातमा पुगेको पुष्टि गरेको छ ।

युएन शाखाकै तल्लो दर्जामा कार्यरत दुई जना कर्मचारीले प्रि स्याट परीक्षाको प्रश्न पत्र दराजबाट चोरी गरेको हुन सक्ने भन्दै प्रहरी प्रधान कार्यालयले डिआइजी लामाको नेतृत्वमा छानविन समिति गठन गरेको थियो ।

शनिबार भएको प्रि—स्याट परीक्षाको प्रश्न पत्र बाहिरएको आशंका गरिएको थियो । त्यही आधारमा परीक्षा एक घण्टा ढिलो गरी सुरु भएको थियो । यसमा उत्तीर्ण हुनेलाई मात्र मिसनको अन्तिम परीक्षामा सहभागी गराउने गरिएको छ ।