काठमाडौं । सुदूरपश्चिम प्रदेश प्रहरी कार्यालय, अपराध अनुसन्धान समूह र इलाका प्रहरी कार्यालय मालाखेतीको संयुक्त टोलीले कैलालीबाट आधा किलो बराबरको सुनसहित तीन जनालाई पक्राउ गरेको छ ।

सुदूरपश्चिम प्रदेश प्रहरी कार्यालय, अपराध अनुसन्धान समूह र इलाका प्रहरी कार्यालय मालाखेतीको संयुक्त टोलीले ४४९.७७ ग्राम सुनसहित शैलेश्वरी सुनचाँदी पसल अत्तरियाका सञ्चालक समिर सिजापति, सोही सुनचाँदी पसलमा कार्यरत सुनसरीका राजु विक र कञ्चनपुरको शुक्लाफाँटा नगरपालिका ८ का भवानी घिमिरे लाई पक्राउ गरेको हो ।

अत्तरियास्थित सडकखण्डमा काठमाडौंबाट महेन्द्रनगरतर्फ जाँदै गरेको ना ८ ख ८३४९ नम्बरको महाकाली यातायातको बसलाई चेकजाँच गर्दा प्रहरीले बसका कन्डक्टर घिमिरेको साथबाट ४९.९५ ग्राम अवैध सुनको बाला र नगद २६ हजार बरामद गरेको जिल्ला प्रहरी कार्यालय कैलालीले जनाएको छ ।

त्यस्तै बसमै सवार राजु विकको साथबाट सुनको बाला र सिक्री गरी जम्मा ३४९।८७ ग्राम अवैध सुन र नगद ६ हजार ९ सय रुपैयाँ पनि बरामद गरिएको जिल्ला प्रहरी कार्यालय कैलालीले जनाएको छ । प्रहरीले उनीहरूको साथबाट ४९ हजार बढी नगद र ५ थान मोबाइल पनि बरामद गरिएको छ ।

प्रहरीका अनुसार पक्राउ परेका उनीहरूसँग सोधपुछ गर्ने क्रममा सुन अत्तरियाका व्यवसायी समिर सिजापतिको खुलेपछि उनलाई पनि पक्राउ गरिएको हो । खानतलासी गर्दा सिजापतिको साथबाट ४९.९५ ग्राम अवैध सुनको बाला र १६ हजार तीन सय नगद बरामद गरिएको थियो ।

भवानी घिमिरे र समिर सिजापतिको साथमा कतार दोहाको बिल रहेको तर किन्ने व्यक्तिको विवरण फरक रहेको प्रहरीले जनाएको छ । थप अनुसन्धानका लागि राजस्व अनुसन्धान कार्यालय, कोहलपुर पठाइने जिल्ला प्रहरी कार्यालय कैलालीले जनाएको छ ।