काठमाडौँ । नेपाली कांग्रेसको महाधिवेशन पुनः सरेको छ । कांग्रेसको १४ औँ महाधिवेशन सारेको छैटौँपटक हो ।

सरेको मितिअनुसार कांग्रेसको महाधिवेशन मंसिर ९ देखि १३ गतेसम्म हुने भएको छ । शनिबार बसेको पार्टीको केन्द्रीय समिति बैठकले महाधिवेशनको मिति सार्ने निर्णय गरेको हो ।

पार्टीका केन्द्रीय सदस्य कल्याण गुरुङका अनुसार कांग्रेस २०७३ मंसिर ३० निर्वाचन आयोगमा दर्ता भएकाले महाधिवेशनको नयाँ तालिकाले असर नगर्ने बताए । उनले भने, “नेपाली कांग्रेसको पाँच वर्ष मंसिर ३० मात्र पुग्छ ।”

उनका अनुसार संविधानको धारा २७० र २७२ ले दल खारेज गर्ने वा प्रतिबन्ध लगाउन नमिल्ने उल्लेख रहेछ । संविधानको धारा २६९ को उपधारा ४ (ख)मा ५ वर्ष ६ महिनाभित्र महाधिवेशन गर्नु पर्ने प्रावधान रहेको छ ।

क्रियाशील विवाद मिलाउन सिटौला, लेखक र रिजाल

क्रियाशील सदस्यतासम्बन्धी विवादको टुंगो लगाउन विशेष कार्यदल बनेको छ । उक्त कार्य दलमा पूर्व महामन्त्री कृष्णप्रसाद सिटौला, डा. मिनेन्द्र रिजाल र रमेश लेखकलाई जिम्मा दिइएको छ ।

लेखक यसअघि क्रियाशील सदस्यता छानविन समितिमा संयोजक थिए । यसैगरी, सिटौला र रिजालले क्रियाशील विवाद समाधानका लागि शीर्ष तहमा काम गरेका थिए ।

उनीहरु भदौँ २ गतेभित्र क्रियाशील विवाद समाधान गरेर ३ गते पार्टी सभापतिलाई बुझाउनु पर्ने केन्द्रीय सदस्य गुरुङले जानकारी दिए ।

यसैगरी निर्वाचन निर्देशिकाको जिम्मेवारी मिनेन्द्र रिजाल र प्रकाशशरण महतले पाएका छन् । उनीहरूले आगामी १ गतेभित्र निर्देशिकाको काम सम्पन्न गरेर २ गते पार्टी सभापति शेरबहादुर देउवालाई प्रतिवेदन बुझाउनु पर्ने छ ।