काठमाडौं । नेपाल विद्युत प्राधिकरणको कार्यकारी निर्देशक पदमा पुनर्वाहाली गरिपाउँ भन्दै हितेन्द्रदेव शाक्य सर्वोच्च अदालत गएका छन् । सोमबार कार्यकारी निर्देशक पदमा पुनर्वाहालीको माग गर्दै शाक्यले सर्वोच्च अदालतमा रिट दर्ता गरेका छन् ।

उनले रिटमा प्राधिकरणमा कुलमान घिसिङको नियुक्ति बदर गर्न माग गरेका छन् । रिटमा शाक्यले पदाधिकारीबाट आफूलाई हटाएको आधिकारिक पत्र नदिएर कुलमानलाई नियुक्ति गरेको दाबी गरेका छन् । यस्तै उनले यसरी आफूलाई हटाएर कुलमानलाई ल्याउँदा संविधान अनुसार आफ्नो अधिकार हनन भएको बताएका छन् ।

उनले विद्युत प्राधिकरणमा आफैंलाई कायम गर्न अन्तरिम आदेशको माग गरेका छन् । उनले प्रधानमन्त्रीको कार्यालय, उर्जा जलश्रोत तथा सिंचाई मन्त्रालय, उर्जा मन्त्री, उर्जा सचिव र कुलमानलाई विपक्षी बनाई रिट दायर गरेका छन् ।

उनले रिटमा आफूलाई साविकको पदमा यथावात कायम राख्न, साउन २५ गतेको मन्त्रिपरिषद बैठकको निर्णय कार्यान्वन नगर्न र आफूलाई विद्युत प्राधिकरणको कार्यकारी निर्देशक पदमा कायम गर्न अन्तरिम आदेशको माग माग गरेका छन् । सरकारले शाक्यलाई सचिव सहरको सेवा सुविधा दिइ ऊर्जा आयोगमा ४ वर्षका लागि नियुक्ति गरिएको थियो ।