काठमाडौँ । नेकपा एमालेका नेता माधव नेपाल पक्षको बैठक सकिएको छ । बैठकपछि पत्रकारसँग बोल्दै माधव पक्ष सांसद विरोध खतिवडाले पार्टी विभाजन हुने संकेत गरेका छन् ।

पत्रकारले तपाईहरूलाई पार्टी विभाजन गर्न २० प्रतिशत भए पनि हुने गरी अध्यादेश आयो नि भन्ने प्रश्नमा सांसद खतिवडाले भने, ‘हाम्रो पक्षमा ३०–४० प्रतिशत नै छ, यो महन्थ ठाकुरहरूलाई सजिलो हुने गरी आएको होला ।’

आज बिहान आकस्मिक रुपमा बसेको मन्त्रिपरिषद्को बैठकमा दल विभाजनसम्बन्धि अध्यादेश जारी भएको थियो । अध्यादेश जारी भएसँगै नयाँ बानेश्वरस्थित एक होटलमा नेता नेपाल पक्षका सांसदहरूको बैठक बसेको हो ।

‘नयाँ दल दर्ता आश्यकताअनुसार हुन्छ, केपी ओली आफ्नो निर्णयबाट ब्याक हुनुपर्छ,’ सांसद खतिवडाले भने, ‘हामी ओलीको जालझेलमा अल्झेर बस्दैनाैँ, आज रातिसम्म केपी ओली सच्चिएर सबै निर्णयबाट व्याक हटेर चर्चामा आएका मागहरू सम्बोधन भए पार्टी दर्ता नहुन पनि सक्छ ।’

उनले नयाँ दल दर्ताबारे खासै छलफल नभएको बताए ।