काठमाडौँ । नेकपा एमालेले माधव नेपाल समूह छाडेर तेस्रो धार बनाएका नेताहरूसहित स्थायी समिति बैठक बोलाउने तयारी गरेको छ । पार्टी अध्यक्ष केपी शर्मा ओलीसँग छलफल गर्न ओली निवास बालकोटमा पुगेका माधव नेपाल छाडेका नेताहरूसँग ओलीले तत्काल बैठक बोलाउने तयारी गर्ने जानकारी दिएको स्रोतले बताएको छ ।

आज बेलुका वा भोलि बिहानसम्म स्थायी समितिको बैठक बोलाउने र पार्टीलाई २०७५ जेठ २ गतेको अवस्थामा फर्काइने र १० बुँदे सहमति कार्यान्वयन गरेर जान तयार रहेको ओलीले जनाएका छन् ।

पार्टी संरचनामा आउने समस्या समाधान गर्न कार्यदल बनाउने र १० बुँदे सहमतिका लागि निश्चित समय सीमासहितको डेटलाइन तय गरेर कार्यान्वयनको चरणमा लैजाने गरी सहमति जुट्न लागेको हो ।

नेपाल समूहमा नगएका भीम रावल, सुरेन्द्र पाण्डे, घनश्याम भुसाललगायतका नेताहरू बिहान ओली निवास बालकोट पुगेका थिए । छलफलमा महासचिव ईश्वर पोखरेलसमेत सहभागी भएका थिए ।