काठमाडौँ । लुम्बिनी प्रदेशका मुख्यमन्त्री कुलप्रसाद केसीले विश्वसको मत पाएका छन् । उनको पक्षमा ४२ मत खसेको थियो भने विपक्षमा शून्य मत खसेको थियो । कूल ८० जना सांसदमा बैठकमा ४३ जना उपस्थित भएका थिए ।

सोमबार बसेको प्रदेशसभा बैठकमा मुख्यमन्त्री केसीले विश्वासको मत दिन आग्रह गरेका थिए । उनले विश्वासको मत माग्दै गर्दा प्रमुख प्रतिपक्षी दल नेकपा एमालेले बैठक बहिस्कार गरेको छ ।

मुख्यमन्त्री केसीलाई नेपाली कांग्रेसका १९, नेकपा माओवादी केन्द्रका १८ (सभामुखबाहेक), जनता समाजवादी पार्टीका ३, राष्ट्रिय जनमोर्चाका १ र स्वतन्त्र सांसद एक गरी ४२ सांसदले मत दिएका थिए ।

उता नेकपा एमालेले सांसद अजय शाही र विमलाकुमारी खत्री वलीलाई कारबाही नगरेसम्म बैठकमा सहभागी नहुने बताउँदै आएको छ । सोहीअनुरुप मुख्यमन्त्रीले विश्वासको मत लिन बोलाएको बैठकमा एमालेका सांसद अनुपस्थित भएका छन् ।